Kozybayev University студенттері АҚШ Елшілігінің ресми қабылдауында болдыв
Kozybayev University мен Аризона университетінің қос диплом бағдарламаларының студенттері Қазақстандағы АҚШ Елшілігінде өткен ресми дипломатиялық қабылдауға қатысты.
Университеттің Басқарма төрағасы - ректорымен бірге олар Америка Құрама Штаттарының тәуелсіздігінің 250 жылдығына арналған салтанатты іс-шараны тамашалады. Іс-шараның жоғары мәртебесін оған ҚР Премьер-министрі Олжас Бектенов пен ҚР Ғылым және жоғары білім министрі Саясат Нұрбектің қатысуы айқындай түсті. Аризона университеті атынан білім беру саласындағы серіктестіктер жөніндегі аға директор Рикки Салазар қатысты.
Солтүстік Қазақстандағы жоғары оқу орны студенттерінің осындай жоғары деңгейдегі іс-шараға шақырылуы Kozybayev University-дің өңірдегі халықаралық білім берудің жетекші орталығы ретіндегі ерекше мәртебесін тағы бір мәрте дәлелдеді.
Қабылдау барысында Қазақстан Республикасындағы АҚШ-тың Төтенше және Өкілетті Елшісі Джули Стаффт университет өкілдерімен жеке кездесу өткізді. Ол Kozybayev University-дің академиялық деңгейіне жоғары баға беріп, жүзеге асырылып жатқан халықаралық білім беру жобасының бірегейлігін ерекше атап өтті. Сонымен қатар Елші ханым студенттерді оқуларын табысты аяқтауларымен шын жүректен құттықтап, олардың жоғары әлеуетіне тоқталып, алдағы кәсіби және ғылыми қызметтеріне толағай табыс тіледі.
Ұзақмерзімді серіктестікке деген ризашылық белгісі ретінде Kozybayev University Халықаралық кампусының түлектері Елші ханымды Петропавл қаласына қос диплом бағдарламалары бойынша білім алған 31 түлекке диплом табыстаудың тарихи рәсіміне шақырды. 11 шілде күні университет Қазақстанда алғаш рет бірегей қос диплом бағдарламалары бойынша даярланған мамандарға диплом табыстайды.
Іс-шара барысында студенттер Премьер-министр Олжас Бектеновпен де жүздесуге мүмкіндік алды. Kozybayev University түлегі Әмір Ағзамов Аризона университетінде алған мол академиялық тәжірибесімен бөлісті. Оның айтуынша, халықаралық білім беру кеңістігіне кірігу студенттерге Data Science және Biotechnology бағыттары бойынша күрделі дипломдық жобаларын сәтті қорғауға ғана емес, сонымен қатар халықаралық кәсіби және академиялық байланыстарын кеңейтуге зор мүмкіндік берген.
Барлық түлектердің атынан Мемлекет басшысына осы бірегей білім беру бастамасын жан-жақты қолдағаны үшін алғыс білдірді.
«Биотехнология мамандығы бойынша бакалавриаттағы білімім шын мәнінде жаһандық деңгейде өтті. Қос диплом бағдарламасы маған әлемнің жетекші ғылыми орталықтарына жол ашты. Сингапур мен Сауд Арабиясында тағылымдамадан өтсем, өткен семестрде Аризона университетінде білім алдым. Жақын арада көптен күткен дипломдарымызды алып, игерген озық біліміміз бен тәжірибемізді Қазақстанның ғылымы мен экономикасын дамытуға жұмсауға дайынбыз», - деп түйіндеді түлек.
