Kozybayev University агросыныптар құру жобасында серіктес болуға дайын
Университет базасында өңірдің аграршыларының, облыстық білім басқармасы мен ауыл шаруашылығы басқармасының өкілдерінің қатысуымен кеңес өтті.
Кездесудің басты тақырыбы – мектептерде агросыныптар құру. Білім алушыларды аграрлық мамандықтарға ерте кәсіптік бағдарлауға бағытталған пилоттық жоба Қазақстан Республикасы Үкіметі бекіткен агроөнеркәсіптік кешенді дамытудың кешенді жоспары аясында Ақмола, Солтүстік Қазақстан және Қостанай облыстарында іске асырылады.
Еліміздің жетекші аграрлық өңірлерінің бірі – Солтүстік Қазақстан облысы үшін бұл бастаманың маңызы ерекше. Себебі дәл осы өңірде Қазақстанның азық-түлік қауіпсіздігінің елеулі бөлігі қамтамасыз етіледі. Алайда жас, білікті әрі заманауи талаптарға сай кадрларсыз саланы одан әрі дамыту мүмкін емес.
Агросыныптар жұмыс берушілердің агроөнеркәсіптік кешендегі кадрларға деген қажеттілігі ескеріле отырып, бейінді агротехнологиялық пәндерді тереңдетіп оқыту мақсатында жалпы білім беретін мектептер базасында қосымша білім беру форматында құрылады. Олар оқушыларға қазіргі ауыл шаруашылығының шынайы келбетін танытуға мүмкіндік береді. Бүгінде бұл салада жасанды интеллект, цифрлық платформалар, ұшқышсыз технологиялар, дәлме-дәл егіншілік, биотехнологиялар және заманауи ауыл шаруашылығы техникасы кеңінен қолданылады.
Kozybayev University осы бастаманы іске асыруда сенімді серіктес болуға дайын. Университет заманауи ғылыми-білім беру базасына ие, ауыл шаруашылығы саласы үшін мамандар даярлауда көпжылдық тәжірибесі бар. Сонымен қатар өңірдің жетекші ауыл шаруашылығы кәсіпорындарымен және халықаралық серіктестермен тығыз ынтымақтастық орнатқан.
ЖОО жоба аясында әдістемелік қолдау көрсетуге, зертханалық базасын ұсынуға, педагогтерді оқытуға және олардың біліктілігін арттыруға дайын. Сондай-ақ оқушыларға арналған қысқы және жазғы мектептерді ұйымдастыру, кәсіптік бағдар беру және оқыту іс-шараларын өткізу жоспарланған. Атап айтқанда, тақырыптық кездесулер, экскурсиялар, бос жұмыс орындары жәрмеңкелері, практикалық сабақтар, шеберлік сыныптары мен конференциялар ұйымдастырылады.