Халықаралық деңгейдегі медальдар: Kozybayev University спортшыларының толайым табысы

Тамыз айының соңында Өзбекстан астанасында жеңіл атлетикадан Орталық Азияның III Ашық чемпионаты өтті. Kozybayev University студенттері мен магистранттары Қазақстан құрамасының намысын абыроймен қорғап, халықаралық деңгейдегі медальдарға ие болды.

«Дене шынықтыру және спорт» білім беру бағдарламасының 2-курс студенті Антонина Чернышова ел құрамасы сапында әйелдер арасындағы 4×100 метрлік эстафетада «алтын» иеленді. Сонымен қатар Антонина 100 метрге кедергілер арқылы жүгіруден 3-орын алды.

Эстафетада (4×100 м) 42,10 секунд нәтижесімен ерлер арасында Қазақстан құрамасы күміс медальға қол жеткізді. Команда құрамында «Дене шынықтыру және спорт» білім беру бағдарламасының 1-курс студенттері Богдан Чернобай, Ромео Петров және Даниил Момот өнер көрсетті.

Қазақстан қоржынына тағы бір күміс медальді 800 метрге жүгіруден 1:52,62 нәтижесімен мәреге екінші болып келген магистрант Никита Изотов салды.

Спортшылардың халықаралық аренадағы бұл табысты өнері - қажырлы еңбектің, жоғары спорттық шеберліктің, сондай-ақ атлеттер мен олардың бапкерлерінің бірлескен ауқымды жұмысының нәтижесі. Спортшыларымыз бен бапкерлер ұжымын үздік нәтижелерімен құттықтаймыз! Алда келе жатқан Қазақстан Республикасының Универсиадасында жаңа жеңістер, биік белестер мен сәтті старттар тілейміз!