Ғалымдардың еңбегі еленді: ТжӘИ мамандарына жаңа ғылыми атақтар берілді
Қазақстан Республикасы Ғылым және жоғары білім министрлігінің Ғылым және жоғары білім саласындағы сапаны қамтамасыз ету комитеті төрағасының бұйрығымен 6D0200 «Тіл және әдебиет» ғылыми бағыты бойынша «қауымдастырылған профессор (доцент)» ғылыми атағы ТжӘИ директоры Елена Сабиеваға және герман-роман филологиясы кафедрасының меңгерушісі Майра Кәкімоваға берілді.
Елена Викторовна - филология ғылымдарының кандидаты, доцент, Қазақстан Республикасының білім беру саласының құрметті қызметкері. Ол Тіл және әдебиет институтын 2018 жылдан бері басқарып келеді. Ғылыми-зерттеу жұмыстарымен белсенді айналысып, «Ономастика», «Солтүстік Қазақстанның топонимиялық ландшафты», «Солтүстік Қазақстан облысының топонимиялық зерттеулері», «Филологиялық өлкетану» бағыттарын дамытуға үлес қосып келеді. Елена Сабиева 90-нан астам ғылыми жарияланымның, оның ішінде 11 оқу және оқу-әдістемелік құралы мен оқулықтың авторы.
Кәкімова Майра Еренғайыпқызы - филология ғылымдарының кандидаты, доцент, Халықаралық ономаст ғалымдар қауымдастығының (ICOS) мүшесі. Ол 20 жылдан астам уақыт бойы ғылыми-зерттеу қызметімен белсенді айналысып келеді. Оның негізгі ғылыми қызығушылықтары тіл біліміне, атап айтқанда ономастикаға, сондай-ақ шет тілдерін оқыту әдістемесіне бағытталған. Майра Еренғайыпқызы жиырма жылдан астам уақыт бойы герман-роман филологиясы кафедрасын басқарып келеді. Кафедраның білім беру бағдарламалары «Атамекен» рейтингісінде бірнеше рет жүлделі орындарға ие болған. Ғалымның 30-дан астам ғылыми мақаласы жарық көрген.
Елена Сабиева мен Майра Кәкімова бірлесіп гранттық қаржыландыру аясында жүзеге асырылған екі маңызды жоба бойынша жұмыс атқарды. Олар: «Солтүстік Қазақстан мен Ресей Федерациясының шекаралас аудандарының топонимиялық ландшафтына интегралды зерттеу жүргізу» және «Қазақстан Республикасындағы білім беру саласының жаңартылған бағдарламасы жағдайында биология сабақтарында ағылшын тілін оқытудағы пәндік-тілдік интеграция» жобалары.
Жүргізіліп жатқан зерттеулердің өзектілігі тіл мен мәдениеттің өзара байланысы мәселелеріне деген қызығушылықтың артуымен байланысты. Топонимиялық лексиканы зерттеу арқылы Ресейдің шекаралас аумақтарындағы қазақтардың тарихи қоныстану аймақтары анықталды.
Ғалымдарымызды осы айтулы жетістіктерімен құттықтаймыз! Ғылыми және педагогикалық қызметтеріңізге толағай табыс, жаңа кәсіби белестерді бағындыруды тілейміз!