Қазақстан мен Қытай: Президенттің технологиялық серіктестік бағытын Kozybayev University жүзеге асыруда

Қытайдың «Синьхуа» ақпарат агенттігіне берген жаңа сұхбатында Қазақстан Президенті Қасым-Жомарт Тоқаев Қазақстан мен Қытай арасындағы ынтымақтастықтың негізгі бағыттарының бірін айқындады. Ол дәстүрлі сауда байланыстарынан бірлескен технологиялық және өндірістік жобаларға көшу қажеттігін атап өтті.

Мемлекет басшысының айтуынша, Қазақстан үшін негізінен шикізаттық модельден өнеркәсіптік және технологиялық кооперацияға көшу маңызды. Яғни бірлескен өндірістер құру, терең өңдеуді дамыту, қосылған құны жоғары өнім өндіру және озық технологиялар трансферін қамтамасыз ету қажет.

Қасым-Жомарт Тоқаев «Синьхуаға» берген сұхбатында екі ел арасындағы ынтымақтастықтың дәстүрлі салалардың шеңберінен шығып, өндіріс, ауыл шаруашылығы өнімдерін терең өңдеу, цифрлық экономика және заманауи агротехнологиялар бағыттарын да қамтып отырғанын атап өтті.

Мұндай серіктестіктің бір мысалы Солтүстік Қазақстанда жүзеге асырылып жатыр. Kozybayev University Қытайдың Henan Agricultural Investment Group компаниясымен бірлесіп, Солтүстік Қазақстан облысы әкімдігінің қолдауымен заманауи ғылыми-технологиялық орталық пен демонстрациялық аграрлық парк құруда.

Жоба Қызылжар ауданы Асанов ауылдық округіне қарасты Михайловка ауылының батыс жағында орналасады. Оны жүзеге асыру үшін өңір 70 гектарға жуық жер телімін бөлді.

Қазір мұнда Қытайдың ауыл шаруашылығы технологиялары мен сорттарын сынау жұмыстары жүргізілуде. Тәжірибелік алқаптарда бидайдың 18, жүгерінің 12 және сояның 2 сорты сынақтан өткізілуде. Негізгі міндет – жоғары өнімді қытайлық сорттардың Солтүстік Қазақстан жағдайында қалай өсетінін зерттеп, оларды одан әрі өнеркәсіптік мақсатта қолдану мүмкіндіктерін анықтау.

Келесі кезең – Kozybayev University мен Henan Agricultural Investment Group бірлескен кәсіпорнын құру. Ол жобаны іске асыруға, қаржыландыруға, құрылыс жұмыстарына, басқаруға және демонстрациялық базаның одан әрі жұмысын ұйымдастыруға жауапты болады. Бірлескен кәсіпорынды Астана халықаралық қаржы орталығының (АХҚО) юрисдикциясында тіркеу жоспарланып отыр.

Аграрлық парк құрамында ғылыми-зерттеу зертханалары, жылыжайлар, селекциялық-тұқым шаруашылығы орталығы, оқу-тәжірибелік кешен, жалпы аумағы шамамен 35 мың шаршы метр болатын қоймалық және өндірістік инфрақұрылым, суару жүйесі, «ақылды» ауыл шаруашылығы элементтері және заманауи ауыл шаруашылығы техникасы қарастырылған.

Жобаның маңызы тек инфрақұрылым мен инвестицияда емес. Қытай тарапы технология мен капитал ұсынса, Kozybayev University ғылыми сараптамасы мен білікті мамандар даярлауды қамтамасыз етеді. Ал Солтүстік Қазақстанның жері осы шешімдерді нақты жағдайда сынақтан өткізуге мүмкіндік беретін алаңға айналады.

Дәл осындай – келіссөздер мен келісімдерден бірлескен зерттеулерге, технологияларға, өндіріске және мамандар даярлауға көшу бағытын Мемлекет басшысы Қазақстан мен Қытай арасындағы қарым-қатынастың перспективалы бағыттарының бірі ретінде атап өтті.