Kozybayev University-де профессор Жұмағали Әшімовтің 70 жылдық мерейтойы аталып өтті

Бүгін университетте профессор, филология ғылымдарының кандидаты Жұмағали Әшімовтің мерейтойы аталып өтті. Жұмағали Мұқашұлы 30 жылдан астам уақытын жоғары білім беру саласына арнады. 1994 жылдан бері М. Қозыбаев атындағы Солтүстік Қазақстан университетінде еңбек етіп келеді. Осы жылдар ішінде университет кәсіподақ комитетінің төрағасы, кафедра меңгерушісі қызметтерін атқарып, Тіл және әдебиет институтын басқарды, Foundation факультетінің деканы болды.

Қазіргі таңда Жұмағали Әшімов Бастауыш, мектепке дейінгі және арнайы білім беру кафедрасының еңбек сіңірген профессоры. Ғалымның 70-тен астам ғылыми жарияланымы жарық көрген.

Жұмағали Мұқашұлының кәсіби қызметі өңірдегі білім беру жүйесінің дамуы және педагог кадрларды даярлау ісімен тығыз байланысты. Еңбек жолында ол жүздеген маман тәрбиелеп шығарды. Бүгінде оның шәкірттері еліміздің түрлі білім беру ұйымдарында жемісті еңбек етіп жүр.

«Біз университеттің қалыптасуының бастауында тұрған, оның дамуына зор үлес қосқан ардагер-профессорларымыз бен білікті педагогтерімізді әрдайым университетіміздің «брендтері» деп атаймыз. Осындай тұлғалар - біздің мақтанышымыз, ұжымымыз бен студент жастарымыз үшін үлгі-өнеге. Сіз де, сөзсіз, солардың бірісіз. Сіздің кәсібилігіңізді, университеттің қоғамдық өміріне белсенді араласқаныңызды, ашықтығыңыз бен адамдарға деген жылы қарым-қатынасыңызды ерекше атап өткім келеді», — деді мерейтой иесіне Басқарма төрағасы - Ректор Ербол Исакаев.

Салтанатты шара барысында Жұмағали Мұқашұлына көп жылғы адал еңбегі, жоғары кәсібилігі және білім беру саласын дамытуға қосқан елеулі үлесі үшін «Еңбек ардагері» және «Манаш Қозыбаев» медальдары табысталды.

Ұстаз әрі тәлімгерді құттықтауға әріптестері мен түлектері, туған-туыстары мен жақындары, сондай-ақ облыстың білім, дене шынықтыру және спорт басқармаларының, «Өрлеу» СҚФ-ның және өңірдегі білім беру ұйымдарының өкілдері жиналды.

Бұл күні мерейтой иесіне көптеген жылы лебіздер айтылып, Жұмағали Мұқашұлының өмірінде елеулі із қалдырған әріптестері бірге еңбек еткен жылдардағы естеліктерімен бөлісті.

«70 жас - салмақты әрі әдемі белес. Алайда бұл жасты үнемі көңілді, жігерлі әрі өмірге құштар жанның болмысымен байланыстыру қиын», - деп атап өтті шараға қатысушылар.

Кеш соңында мерейтой иесі де өз естеліктерімен бөлісті. Ол жиналғандарға жылы лебіздері үшін алғысын білдіріп, өзі қызмет етіп келе жатқан университеттің жетістіктеріне әрдайым қуанышты екенін жеткізді.

«Маған осындай жолды - педагогика мен ғылым жолын сыйлаған тағдырға шын жүрегіммен ризамын. Университетіміздің ажырамас бөлігіне айнала отырып, мені жылы қабылдаған жандарды әрдайым ризашылықпен еске аламын. Олар - Ф. А. Сим, В. Ф. Зайберт, З. П. Табакова. Олар маған 1994 жылы осы оқу орнының ұжымына қосылу туралы шешімімнің дұрыс болғанына бір сәт те күмәндануға мүмкіндік бермеді», - деді Жұмағали Әшімов.

Бұл кеш жай ғана мерейтойлық датаға арналған мереке емес, мамандыққа деген адалдықтың, өмірлік тәжірибе мен жасампаз еңбектің шынайы салтанатына айналды.

Жұмағали Мұқашұлы сынды тұлғалар - университеттің алтын қоры, ұрпақтар сабақтастығының жарқын үлгісі әрі академиялық қауымдастықтың рухани өзегі. Оның бойындағы жігері, ғылымға және адамдарға деген шынайы сүйіспеншілігі жас мамандарға әлі де бағыт-бағдар беріп келеді. Бұл — нағыз мамандыққа деген сүйіспеншілік пен өмірлік ұстанымның адам жүрегінде мәңгілік із қалдыратынын көрсетеді.

Құрметті профессорға зор денсаулық, сарқылмас шабыт, ұзақ та бақытты ғұмыр, шәкірттері, әріптестері мен жақындарының ортасында көптеген қуанышты сәттер тілейміз!