Өңірдің АӨК дамыту мәселелері Kozybayev University алаңында талқыланды

Kozybayev University-де Солтүстік Қазақстан облысының аграрлық сектор өкілдері мен Қытай Халық Республикасының делегациясы арасында кездесу өтті. Қытай делегациясының құрамына Шыңжаң аграрлық кәсіптік-техникалық университеті мен «Тайкунь» Шыңжаң корпорациясының өкілдері кірді.

Солтүстік Қазақстан облысы – еліміздің жетекші аграрлық өңірлерінің бірі. Мұнда Қазақстанның дәнді дақылдарының шамамен үштен бірі өндіріледі. Өңір майлы дақылдар өндірісінде көшбасшы орындардың бірін иеленіп, ауыл шаруашылығы өнімдерін терең өңдеуді дамытуда.

СҚО ауыл шаруашылығы және жер қатынастары басқармасының басшысы Дәурен Тоқұжинов өңірдің аграрлық секторының әлеуеті туралы баяндады. Ал СҚО ветеринария басқармасының басшысы Жанат Амержанов өңірдегі ветеринариялық қауіпсіздік жүйесі мен саланы дамытудың негізгі бағыттарын таныстырды.

Кездесуге қатысушылар АӨК-ті трансформациялауда ғылым мен білімнің рөліне ерекше назар аударды. Kozybayev University аграрлық салаға мамандар даярлап, биотехнология, агротехнология, ауыл шаруашылығын цифрландыру және инновациялық шешімдерді енгізу бағыттарында ғылыми зерттеулер жүргізіп келеді.

Сондай-ақ қатысушылар өңірдің инвестициялық мүмкіндіктерін талқылады. «Солтүстік» ӘКК» АҚ Инвесторларға қызмет көрсету орталығының директоры Әділ Илеусізов АӨК саласында серіктестер тартуға және жоғары қосылған құны бар жобаларды жүзеге асыруға қызығушылық бар екенін атап өтті.

Инвестиция тартудың маңызды құралдарының бірі – «Qyzyljar» арнайы экономикалық аймағы. Бүгінде аймақта 22 қатысушы тіркеліп, 6 жоба жүзеге асырылды. Олардың қатарында Шаньдун провинциясынан келген инвестордың қатысуымен іске асырылған жоба да бар.
Кездесу барысында тараптар кадр даярлаудан бастап ауыл шаруашылығы өнімдерін өңдеуді дамытуға және жаңа агротехнологияларды енгізуге дейінгі бірлескен білім беру, ғылыми және өндірістік жобаларды іске асыру перспективаларын қарастырды.