Kozybayev University мен «Молсервис» сүт өнеркәсібіне арналған бірлескен шешімдер әзірлейді

Kozybayev University-де «Молсервис» ЖШС өкілдерімен кездесу өтті. Оған кәсіпорын директоры Ғалибек Рамазанов, зертхана меңгерушісі Елена Семенова, өндіріс жөніндегі директордың орынбасары Андрей Макаренко, Kozybayev University ректоры Ербол Исакаев, Агротехнологиялық факультет деканы Алтын Шаяхметова, «Азық-түлік қауіпсіздігі» кафедрасының меңгерушісі Дмитрий Иль, ПЦФ жобасының ғылыми жетекшісі Дмитрий Берилло, ЖИ және цифрлық трансформация орталығының жетекшісі Гульнар Ким қатысты.

«Молсервис» сүт өнімдерінің 20-дан астам түрін шығарады. Кәсіпорында шамамен 120 адам жұмыс істейді, олардың арасында М. Қозыбаев атындағы СҚУ түлектері де бар.

Тараптар ынтымақтастықтың бірнеше бағытын белгіледі:
- бірлескен зерттеулер, жаңа компоненттер мен ашытқылар әзірлеу;
- су мен сүт шикізатының сапасын бақылау;
- кәсіпорынның нақты міндеттері негізінде ғылыми, дипломдық және магистрлік жобалар әзірлеу;
- студенттердің практикасы және дуалды оқыту.

Сонымен қатар ЖИ және цифрлық трансформация орталығында өтінімдерді қалыптастыру және басқаруға арналған қосымша әзірлеу мәселесі талқыланды.