Kozybayev University қызметкерлері хроматографиялық жабдықтармен жұмыс істеу бойынша біліктіліктерін арттырды

Kozybayev University-дің төрт қызметкері - Жапабаева А.Б., Әлиева К.Ж., Уазирова В.В. және Умарова А.М. - Kozybayev Labs ғылыми-зерттеу зертханаларының өкілдері ретінде газ және сұйық хроматографтармен жұмыс істеу бойынша 10 күндік кешенді теориялық және практикалық оқыту курсынан өтті. Оқыту Астана қаласында «ProLabSupport» ЖШС компаниясының ұйымдастыруымен өткізілді.

Оқу бағдарламасы газ және жоғары тиімді сұйық хроматография бағыттары бойынша теориялық дайындық пен практикалық сабақтарды қамтыды. Қатысушылар жабдықтардың жұмыс істеу принциптерін меңгеріп, талдау параметрлерін баптауды, калибрлеуді, OpenLAB CDS бағдарламалық жасақтамасы арқылы алынған нәтижелерді өңдеуді, сондай-ақ аспаптарға диагностика жүргізу және техникалық қызмет көрсету тәсілдерін үйренді.

Алынған білім мен практикалық дағдылар университет зертханаларындағы ғылыми-зерттеу жұмыстарының сапасын арттыруға және заманауи аналитикалық жабдықтарды тиімді пайдалануға мүмкіндік береді.