Фитопатология және өсімдіктерді қорғау саласында Қытайлық серіктестермен ынтымақтастықты дамытамыз
Kozybayev University Қытайдың жетекші аграрлық жоғары оқу орындарының бірі – Янлинь қаласындағы Солтүстік-Батыс ауыл және орман шаруашылығы университетімен (Northwest A&F University) 10 жылдан бері тығыз ынтымақтастық орнатып келеді. Бүгінде магистратура бойынша қос диплом бағдарламалары жүзеге асырылып, білім алушылар арасында академиялық алмасу жүргізілуде. Сонымен қатар агроөнеркәсіптік кешен, су ресурстары және азық-түлік қауіпсіздігі бағыттарында ауқымды ғылыми зерттеулер қолға алынған.
Осы аптада университетімізге Қытай Халық Республикасынан серіктестер делегациясы келді. Оның құрамында Өсімдіктерді қорғау колледжінің профессорлары Gangming Zhan, Yiping Li, Xiangqun Yuan және докторанттар Умида Мухтарова мен Авазбек Олимов болды. Сондай-ақ университетке экологиялық өсімдік қорғау саласына маманданған ірі қытайлық биотехнологиялық компанияның Қазақстандағы өңірлік өкілдігі – Pherobio Technology Kazakhstan компаниясы бас директорының орынбасары Lei Liu келді.
Сапар барысында қытайлық әріптестер университеттің агробиологиялық станциясын аралап, ғылыми-зерттеу инфрақұрылымымен және тәжірибелік алаңдарымен танысты.
Агротехнологиялық факультеттің профессор-оқытушылар құрамымен өткен кездесуде ғалымдар өз зерттеулерінің негізгі бағыттарын таныстырып, ғылыми нәтижелерімен бөлісті және ынтымақтастықты одан әрі дамыту перспективаларын талқылады.
Кездесуде фитопатология, ауыл шаруашылығы дақылдарының зиянкестері мен ауруларын мониторингтеу, жеміс-жидек екпелерін қорғау және өсімдіктерді қорғаудың экологиялық қауіпсіз әдістерін әзірлеу мәселелеріне ерекше назар аударылды.
Кездесудің маңызды нәтижелерінің бірі – Northwest A&F University Өсімдіктерді қорғау колледжімен ынтымақтастықтың басталуы. Әріптестік аясында бірлескен ғылыми зерттеулер жүргізу, ғылыми тәжірибе алмасу, академиялық ұтқырлықты дамыту және жас ғалымдарды халықаралық зерттеу жобаларына тарту көзделіп отыр.
Бұл серіктестік Қазақстан мен Қытайдың ауыл шаруашылығы үшін өзекті өсімдіктерді қорғау саласындағы практикалық шешімдерді әзірлеуге негіз болады.
