Талапкерлерге Білім алушыларға Оқытушыларға Кафедра меңгерушілеріне Декандарға Электронды ректорат Documentolog Қаз Рус Eng
Жатақханаға орналасуға өтінім беру
"Манаш Қозыбаев атындағы
Солтүстік Қазақстан университеті"
коммерциялық емес акционерлік қоғамы
Үлкейтілген

Зарқын Тайшыбай атындағы дәрісхана

Көктемнің шуақты мерекесі Наурыз мейрамы қарсаңында университетіміздің «Журналистика» кафедрасы Қазақстанның еңбек сіңірген қайраткері, профессор Зарқын Тайшыбай атындағы дәрісхананың ашылуын Тарих, экономика және құқық факультетінің 10 жылдығына орайластырып өткізді. Зарқын Тайшыбай ғылым мен еңбек жолындағы қиындықты еңсеріп, табандылықтың арқасында талай белесті бағындырды. Ол 1992 жылдан Е.А.Бөкетов атындағы ҚарМУ-дың «Журналистика» кафедрасының меңгерушісі қызметін атқарып, 2000 жылдан бастап М. Қозыбаев атындағы Солтүстік Қазақстан мемлекеттік университетіне қызметке келді. Ұстаз-ғалымның қазақстандық журналистика саласының дамуына қосқан үлесі зор.

Оқу ордамызда 2001 жылы профессор, қазақ филологиясы кафедрасының негізінде  «Журналистика» мамандығын және магистратурасын ашты. Оның бұл бастамасы Солтүстік өңірде қазақ тіліндегі журналистиканың дамуына серпіліс берді. Дәл сол жылдан бері ЖОО-да өзі ұйымдастырған «Этномәдени зерттеулер» ғылыми-зерттеу орталығын басқарады. 60 жылдан астам ғұмырын журналистика саласына арнады. 2016 жылы «Қазақстанның еңбек сіңірген қайраткері» атағы берілді. 2021 жылдан бастап М.Қозыбаев университетінің «Құрметті профессоры». Атаулы дәрісхананың ашылуына бастамашылық танытқандар мен демеушілер қатарында «Журналистика» білім беру бағдарламасының түлектері, профессордың шәкірттері мен Е.Бөкетов атындағы ҚарУ-дың «Журналистика» кафедрасындағы әріптестері бар. Салтанатты ашылу Зарқын Тайшыбайдың ғылыми еңбектерінің  көрмесінен басталды. Солтүстік Қазақстан мемлекеттік архиві сый ретінде жастық шағынан, қоғамдық қызметінен көрме ұсынды. Шараға СҚО зиялы қауымы мен әріптестері мен шәкірттері жиналды. Айтулы сәтте нағыз ұстаз, тәлімгердің атына жылы лебіздер айтылды.

«Зарқын Тайшыбай СҚО мен Қарағанды облысының 30 жылдағы  журналистерін даярлап келе жатқан атасы. Одан кейін де жүздеген шәкірт тәрбиеледі. Келесі буын жастары ағамыздың еңбегін білсін, көрсін деген оймен бірлесе отырып бір жылдың көлемінде жүзеге асырдық. Ғалымның еңбегі уақытында бағалануы керек. Дәрісхана студенттердің, ғалымдар мен зерттеушілердің ізденісіне шабыт беретін, ғылыми және кәсіби жетістіктерге жетелейтін орынға айналары сөзсіз. Алдағы уақытта аудиторияны техникалық тұрғыдан жабдықтайтын боламыз»,- деді Қызылжар-Ақпарат ЖШС директоры Ербақыт Амантайұлы.

Білікті кадрлар даярлап келе жатқан ұстазға көпшілік алғыс айтып, салада өз орнын тапқан әр түлек шексіз алғысын білдірді. Кафедраның түлектері бүгінде республикалық, облыстық телеарналарда, мерзімді басылым беттерінде қызмет атқарып жүр. Бүгінде Зарқын Сыздықұлының өмір жолы мен ғылыми-шығармашылық ізденісі көпке үлгі.

18.03.2024
Яндекс.Метрика