Қозыбаев университетінде Айдын Айымбетовпен кездесу өтті
Қозыбаев университетінің студенттері Қазақстан Республикасының Халық Қаһарманы, ұшқыш-ғарышкер, авиация генерал-майоры Айымбетов Айдын Ақанұлымен кездесуге мүмкіндік алды.
Шараға Солтүстік Қазақстан облысы әкімі аппаратының басшысы Руслан Алишев және Қозыбаев университетінің Директорлар кеңесінің мүшесі Анатолий Башмаков қатысты.
Бұл кездесу жастар үшін нағыз батыл армандардың, еңбек пен тәртіптің айқын үлгісін көрсетеді . Айдын Ақанұлы-2015 жылы «Союз ТМА-18М» кемесінің экипажы құрамында халықаралық ғарыш станциясына ұшқан тәуелсіз Қазақстанның алғашқы ғарышкері. Ол ғарышта 10 тәулікке жуық ғылыми эксперименттерді орындап, Қазақстанды халықаралық деңгейде таныстырды. Бүгінде ол «Бәйтерек »БК»АҚ бірлескен кәсіпорнының Басқарма Төрағасы қызметін атқарады.
Кездесу барысында ғарышкер өзінің қызметі, өмір жолы туралы айтып берді.
«Мен ХҒС-қа ұшқан кезде 6 мемлекеттің өкілдері болды. Бүгінде Қазақстан 7 ғарыштық державаның қатарына кіреді. Бізде аты аңызға айналған Байқоңыр ғарыш айлағы, ғарыш техникасы жобаланатын және сынақтар жүргізілетін құрастыру-конструкторлық кешен бар. Ғарыш саласына қызығатын жастарды «Бәйтерек» кәсіпорнында жұмыс істеуге шақырамын», - деді Айдын Айымбетов.
Студенттер қонаққа отандық ғарыш саласын дамыту, ғылыми зерттеулердің болашағы туралы маңызды сұрақтарын қойды.
Университеттің оқу-зертханалық корпус жанындағы аллеяға Айдын Айымбетовтің атаулы шыршалары отырғызылды.
Оқу, ғылым және қоғамдық өмірде ерекше көзге түскен студенттерге университет тарихында алғаш рет Айдын Айымбетов атындағы арнайы сыйлықтар табысталды. Ал жоғары оқу орнының қызметкерлері батырдың қолынан алғыс хаттар алды.
Қазақстан әлемдік ғарыш тарихында ерекше орын алады. Байқоңыр ғарыш айлағынан адамзаттың ғарышты игеру дәуірі басталды. Бүгінгі таңда Байқоңыр әлемдегі ең маңызды ғарыш кешендерінің бірі болып қала береді. Қазақстандық жастар үшін еліміздің ғарыш саласын дамытуға үлес қосып жүрген тұлғалармен жүздесу — үлкен мақтаныш.
Мұндай игі бастамалар студенттерді батыл армандарға, білім мен ғылымға ұмтылуға жігерлендіреді.
