2026 жылғы қабылдау науқаны: талапкерлер үшін маңызды мерзімдер мен мүмкіндіктер
Өңірлік коммуникациялар қызметінде «2026 жылғы білім беру гранттары: әрбір талапкер нені білуі керек?» тақырыбында Kozybayev University өкілдерінің қатысуымен брифинг өтті.
Биыл мемлекет тарапынан талапкерлерге ауқымды қолдау көрсетілуде. Республика бойынша бакалавриатқа барлығы 75 371 мемлекеттік білім беру гранты бөлінді.
Мемлекеттік гранттар конкурсына өтініш қабылдау 13 шілдеден басталды. Өтініш беру кезінде талапкерлер 4 жоғары оқу орнын және 4 білім беру бағдарламалары тобын (ҰБТ-дағы бейіндік пәндер сәйкес келген жағдайда) таңдай алады.
«2024 жылдан бастап Kozybayev University-де дуальды оқыту жүйесі енгізілді. Біз еңбек нарығының сұранысын алдын ала ескере отырып, мамандар даярлауға басымдық береміз. Соның нәтижесінде бакалавриат студенттері 3-курстан бастап университетте білім алып қана қоймай, жұмыс істеуге де мүмкіндік алады. Осылайша оқуын аяқтаған кезде олардың еңбек өтілі қалыптасады», – деді Kozybayev University Академиялық мәселелер жөніндегі Басқарма мүшесі Айгүл Нұрпейісова.
Kozybayev University-де «Серпін» бағдарламасы бойынша 145 грант, ал педагогикалық квота аясында 160 грант бөлінген.
«Біз талапкерлерді әлеуметтік қолдауға ерекше көңіл бөлеміз. Университетте келесі санаттағы азаматтарға арналған жеңілдік квоталары қарастырылған: жетім балалар және ата-анасының қамқорлығынсыз қалған балалар; бала кезінен мүгедектігі бар адамдар, сондай-ақ І және ІІ топтағы мүгедектігі бар азаматтар; бала кезінен мүгедектігі бар немесе І және ІІ топтағы мүгедектігі бар баланы тәрбиелеп отырған отбасылардың балалары; қандастар; кемінде үш жыл бойы көпбалалы немесе толық емес отбасы мәртебесіне ие отбасылардан шыққан талапкерлер. Жеңілдік алу үшін талапкер тиісті растайтын құжаттарды ұсынуы қажет. Сонымен қатар, квота бойынша өту балдары әр университетте әртүрлі болатынын атап өткім келеді. Бұл көрсеткіш нақты жоғары оқу орнына тапсырылған өтініштер санына тікелей байланысты», – деді Kozybayev University Қабылдау және рекрутинг офисінің жетекшісі Гүлмира Оспанова.
Kozybayev University-де Аризона университетімен стратегиялық серіктестік жобасы табысты жалғасуда. Қазіргі уақытта ағылшын тілінде оқытылатын қос дипломды бағдарламаларға қабылдау жүргізілуде. Оқу соңында түлектер қазақстандық және америкалық екі диплом алады.
Бұл бағдарламаларға түсу үшін талапкерлер ағылшын тілін B1 деңгейінде меңгергенін растауы қажет. IELTS, Duolingo, TOEFL сертификаттары немесе Kozybayev University ұйымдастыратын KUEPT ішкі тестінің нәтижесі қабылданады. KUEPT тестін университетте офлайн немесе оқу орнының ресми сайтында онлайн форматта тегін тапсыруға болады.
Сонымен қатар, қазақ және орыс тілдерінде оқытылатын бірлескен білім беру бағдарламалары да ұсынылады. Бұл бағдарламалардың түлектері Аризона университетінің стандарттарына сәйкес білім сапасын растайтын құжатқа ие болады.
«Биыл Аризона университетімен бірлескен бағдарламаларға мынадай көлемде грант бөлінді: қос дипломды білім беру бағдарламаларына – 200, бірлескен білім беру бағдарламаларына – 300 грант. Оның ішінде «Басқарудағы ақпараттық жүйелер» бағдарламасына – 165 грант, «Биотехнология» бағытына – 55 грант, педагогикалық бағыттарға – 70 грант қарастырылған. Биыл біз жаңа «Бизнес және менеджмент» бағдарламасын іске қостық. Бұл бағытқа қос диплом бағдарламасы бойынша – 55, бірлескен бағдарлама бойынша – 70 грант бөлінді. Бұдан бөлек, «Маркетинг және жарнама» бағдарламасына 39 грант қарастырылған. Жалпы экономикалық мамандықтарға 164 грант бөлінді. Грантқа педагогикалық бағдарламалар бойынша ҰБТ-дан 75 балдан жоғары, ал басқа барлық бағыттар бойынша 50 балдан жоғары жинаған талапкерлер үміткер бола алады», – деді Kozybayev University Халықаралық кампусының атқарушы директоры Әсет Жанисов.
Мемлекеттік гранттар конкурсына өтініш қабылдау 20 шілдеге дейін жалғасады. Университетке құжат қабылдау 25 тамызға дейін жүргізіледі.
Kozybayev University қабылдау комиссиясы демалыссыз, күн сайын 09:00-ден 18:00-ге дейін жұмыс істейді.
Мекенжайы: Петропавл қаласы, Пушкин көшесі, 86Б.