Жапония ғалымдары Kozybayev University барды

М.Қозыбаев атындағы Солтүстік Қазақстан университетіне Жапонияның жетекші ғылыми және білім беру ұйымдарының өкілдері арнайы жұмыс сапарымен келді.

Делегация құрамында Жапонияның Ұлттық ауыл шаруашылығы және азық-түлік зерттеулері ұйымының (NARO) Көкөніс және гүл шаруашылығы институтының аға ғылыми қызметкері Томохиро Какизаки, ғылыми қызметкер Рэйка Нишио және Токио ауыл шаруашылығы университетінің Ауыл шаруашылығы факультетінің доценті Саки Йошида бар.

Кездесу барысында тараптар ауыл шаруашылығы ғылымын дамыту, көкөніс дақылдарының селекциясы, жылыжай технологиялары, өсімдіктерді қорғау, азық-түлік қауіпсіздігі, биотехнология және тұрақты ауыл шаруашылығы бағыттарындағы бірлескен зерттеулердің перспективаларын талқылады.

Сонымен қатар академиялық ұтқырлықты дамыту, оқытушылар мен зерттеушілердің тағылымдамаларын ұйымдастыру, бірлескен ғылыми жобаларды, семинарлар мен жазғы мектептерді іске асыру мәселелеріне ерекше назар аударылды.

Жапонияның жетекші ғылыми орталықтарымен әріптестікті нығайту университетіміздің халықаралық байланыстарын кеңейтіп, ғылым мен білім беру саласындағы жаңа мүмкіндіктерге жол ашады.