Үш жекпе-жек - үш жеңіс: Никита Косторнов халықаралық турнирдің жеңімпазы атанды

Kozybayev University «Дене шынықтыру және спорт» білім беру бағдарламасының 2-курс студенті Никита Косторнов КСРО-ның еңбек сіңірген спорт шебері, Олимпиада ойындары мен әлем чемпионатының жүлдегері Александр Мирошниченконың құрметіне арналған бокстан халықаралық турнирдің жеңімпазы атанды. Жарыс Қостанай қаласында өтті.

Спортшымыз Солтүстік Қазақстан облысының намысын 85 кг-ға дейінгі салмақ дәрежесінде қорғады. Никита үш жекпе-жек өткізіп, үшеуінде де жеңіске жетіп, алтын медальді қанжығасына байлады.
Турнирге дайындық алдын ала басталған. СҚО бокстан аға жаттықтырушысы, Kozybayev University түлегі Денис Языковтың айтуынша, боксшылар жалпы дене дайындығын жетілдіру бойынша оқу-жаттығу жиындарынан, сондай-ақ Қарағанды қаласында жауынгерлік дайындық жиынынан өткен.

Халықаралық турнир солтүстікқазақстандық боксшылар үшін қазан айында Тараз қаласында өтетін Қазақстан Республикасының чемпионатына, сондай-ақ 2027 жылы Алматыда өтетін Қазақстан Республикасының Жазғы Универсиадасына дайындықтың маңызды кезеңі болды. Чемпионатта спортшылар жүлделі орындар үшін және Қазақстан ұлттық құрамасының сапына ену мүмкіндігі үшін бақ сынайды.

Никита Косторновқа алдағы спорттық жолында толағай табыс пен жарқын жеңістер тілейміз!