Жапонияның Ұлттық ауыл шаруашылығы және азық-түлік зерттеулері ұйымы (NARO) мен Hirosaki University делегациясымен кездесу

Кездесу барысында тараптар бірлескен зерттеулер жүргізу, технологиялар алмасу және жас мамандарды даярлау мәселелерін талқылады.

Ынтымақтастықтың негізгі бағыттарының бірі — өсімдіктердің генетикалық ресурстарын зерттеу және сақтау. Жапон ғалымдары Солтүстік Қазақстан және Ақмола облыстарында экспедициялар ұйымдастырып, жергілікті мәдени және жабайы өсімдіктердің үлгілерін жинауда. Әсіресе пияз бен сарымсақ, асқабақ тұқымдас және қырыққабат дақылдарына ерекше қызығушылық танытып отыр. Алдағы уақытта жиналған материалдарды Қазақстанда құрылып жатқан генетикалық банкке сақтап, селекциялық жұмыстарда пайдалану жоспарлануда.

Hirosaki University профессоры Кацунори Танака атап өткендей, жапон ғалымдарын өңірдің жергілікті және жабайы өсімдіктері ерекше қызықтырады.

«Жапония үшін аумағының шектеулі болуына байланысты жаңа генетикалық ресурстарды іздеу аса маңызды. Біз жергілікті және жабайы өсімдіктерді жинаймыз. Болашақта оларды зерттеп, будандастырып, жаңа сорттар шығару үшін пайдалануға болады», — деді Кацунори Танака.

Ынтымақтастық аясында академиялық алмасу бағдарламаларын жүзеге асыру, тағылымдамалар ұйымдастыру, жапон ғалымдарының студенттерді даярлау үдерісіне қатысуы және халықаралық гранттар бойынша бірлескен жұмыстар жүргізу көзделген.

«Біздің мақсатымыз — жекелеген сапарлар мен экспедициялардан жүйелі серіктестікке көшу. Студенттеріміз бен ғалымдарымыздың Жапониядағы ғылыми-зерттеу орталықтарында тәжірибе жинақтап, жұмыс істеуіне, ал жапондық мамандардың Солтүстік Қазақстанда зерттеу жұмыстарын жүргізіп, студенттерімізге білім беруіне мүдделіміз», — деп атап өтті Kozybayev University Басқарма төрағасы — ректор Ербол Исакаев.