Адалдық пен құқықтық мәдениетті қалыптастыру: Kozybayev University-де сарапшылармен кездесу өтті

Kozybayev University солтүстікқазақстандық жастар арасында сыбайлас жемқорлыққа қарсы көзқарасты қалыптастыруға ерекше мән береді. Осы бағыттағы профилактикалық жұмыстарды жүргізу мақсатында университетте «Саналы ұрпақ» жобалық кеңсесінің қызметі аясында түрлі іс-шаралар ұйымдастырылып келеді.

Осындай шаралардың бірі профессор-оқытушылар құрамы мен университет қызметкерлері арасында «Жоғары білім беруде сыбайлас жемқорлыққа қарсы мәдениет пен академиялық адалдықты қалыптастыру» тақырыбында өткен оқыту семинары болды.

Семинарда спикер ретінде ҚР Мемлекеттік қызмет істері агенттігінің Солтүстік Қазақстан облысы бойынша департаменті басшысының орынбасары А.К. Баймұқанов және Солтүстік Қазақстан облысы бойынша Адам құқықтары жөніндегі уәкіл Ж.Ж. Жұмабаев сөз сөйледі.

Сарапшылар сыбайлас жемқорлыққа қарсы стандарттардың сақталуын бақылау, сыбайлас жемқорлық құқық бұзушылықтары үшін көзделген әкімшілік жауапкершілік мәселелері жөнінде түсіндірме берді. Сонымен қатар мемлекеттік қызметшілердің объективтілігі мен бейтараптығына әсер ететін жағдайлар талқыланып, мүдделер қақтығысына қатысты нақты кейстер қарастырылды.

Kozybayev University-де осындай оқыту семинарларын өткізу - адал әрі жауапты ұрпақты тәрбиелеуге бағытталған стратегиялық қадам. Сыбайлас жемқорлыққа қарсы тұрақты иммунитет қалыптастыру және академиялық адалдық қағидаттарын берік орнықтыру жоғары білім беру жүйесі мен жалпы қоғамның болашағын айқындайтын маңызды факторлардың бірі болып табылады.