Қозыбаев университеті Fulbright бағдарламасы аясындағы халықаралық ынтымақтастықты нығайтуда

Қозыбаев университетінде оқу орны басшылығының Қазақстандағы АҚШ елшілігінің өкілдерімен және Fulbright English Teaching Assistant (ETA) бағдарламасының ағылшын тілі оқытушысының ассистенті Лео Баббпен ресми кездесуі өтті.

Кездесу барысында академиялық және тілдік ынтымақтастықты одан әрі дамыту, халықаралық білім беру бағдарламаларын жүзеге асыру, сондай-ақ студенттер мен оқытушылар үшін жаңа мүмкіндіктерді кеңейту мәселелері талқыланды.

Бүгінде Қозыбаев университеті әлемнің әртүрлі елдерінен келген оқытушылар мен зерттеушілерді біріктіріп отыр. Университеттің білім беру үдерісіне АҚШ, Италия, Түркия, Үндістан және Пәкістан мамандары қатысады. Биыл оқу орны Африка және Оңтүстік-Шығыс Азия елдерінен алғашқы студенттерді қабылдауды күтуде. Сонымен қатар Қытаймен академиялық алмасу жұмыстары жалғасып келеді.

Кездесуде Fulbright бағдарламасына ерекше назар аударылды. АҚШ елшілігінің өкілдері Kozybayev University-мен ынтымақтастықтың маңыздылығын атап өтіп, оқу орнының жоғары академиялық әлеуетін, соның ішінде герман-роман филологиясы кафедрасының мүмкіндіктерін жоғары бағалады.

Fulbright бағдарламасы аясында университетте ағылшын тілі оқытушысының ассистенті Лео Бабб жұмысын бастайды. Лео АҚШ-тың Массачусетс штатындағы Holy Cross колледжін «орыс тілі мен әдебиеті» мамандығы бойынша тәмамдаған. Сонымен қатар философия пәнін оқыған. 2025 жылдың жазында Латвиядағы Даугавпилс университетінде өткен орыс тілі бағдарламасына қатысты.

Лео үшін Қазақстанның «Тілдер триадасы» тіл саясаты және халықтар арасындағы мәдени байланыстар ерекше қызығушылық тудырады.

Қозыбаев университетінде ол Тіл және әдебиет институтында сабақ өткізіп, студенттердің ағылшын тіліндегі ауызша және жазбаша сөйлеу дағдыларын дамытуға үлес қосады.