Nazarbayev University өңірлермен жұмысты күшейтуде: алғашқы серіктесі – Kozybayev University
Солтүстік Қазақстан облысының әкімдігінде облыс әкімі Ғауез Нұрмұхамбетовтің Nazarbayev University президенті Вакар Ахмадпен және Kozybayev University басшылығымен кездесуі өтті. Солтүстік Қазақстан – Nazarbayev University делегациясы еліміздің өңірлік жоғары оқу орындарымен ынтымақтастықты дамыту мақсатында республика бойынша жұмыс сапары аясында барған алғашқы өңір.
Кездесудің басты нәтижесі – Kozybayev University мен Nazarbayev University арасында ынтымақтастық туралы меморандумға қол қойылуы. Құжат бірлескен білім беру және ғылыми жобаларды жүзеге асыруды, академиялық ұтқырлықты дамытуды, кадрлар даярлауды, технологиялар трансферін және ғылыми әзірлемелерді коммерцияландыруды көздейді.
«Біз үшін экономиканың қазіргі қажеттіліктеріне сай мамандар даярлау ғана емес, сонымен қатар өзіміздің ғылыми және технологиялық құзыреттерімізді қалыптастыру маңызды. Біз өңірдің әлеуетін еліміздің жетекші университеттерінің мүмкіндіктерімен біріктіргіміз келеді», – деді СҚО әкімі Ғауез Нұрмұхамбетов.
Бүгінде облыс экономикасына 4,2 мыңнан астам маман қажет. Осыған байланысты жоғары оқу орындарының бизнеспен ынтымақтастығы және жаңа құзыреттерді дамыту ерекше маңызға ие болып отыр.
Kozybayev University бірлескен жұмыстың жеті негізгі бағытын ұсынды. Олар: жасанды интеллект, ақылды ауыл шаруашылығы, агрогеномика, су ресурстары, экологиялық мониторинг, жаңа материалдар және қашықтан зондтау. Бұл бағыттар ауыл шаруашылығына, су ресурстарын бақылауға және табиғи қауіп-қатерлердің алдын алуға арналған практикалық шешімдерді әзірлеуді көздейді.
Nazarbayev University президенті Вакар Ахмад Kozybayev University-дің ғылыми және инфрақұрылымдық әлеуетін атап өтіп, өңірлік жоғары оқу орындарымен зерттеу, инновация және технологиялық даму салаларындағы ынтымақтастықтың маңыздылығына тоқталды.
Кездесу барысында Kozybayev University, Nazarbayev University және University of Arizona арасындағы үшжақты ынтымақтастық мәселелері де талқыланды.
«Біз үшін ынтымақтастықтың өңір үшін маңызды нақты міндеттерден басталуы аса маңызды. Ғалымдардың бірлесіп жұмыс істеуіне және практикалық нәтижеге бағытталған жобаларды жүзеге асыруға мүмкіндік мол деп санаймыз», – деп атап өтті Kozybayev University ректоры Ербол Исакаев.
Келесі кезеңде бірлескен зерттеу топтарын құру, жобаларды іріктеу, оларды қаржыландыру тетіктерін және іске асыру мерзімдерін айқындау жоспарланып отыр.
