Kozybayev University мен University of Arizona қос диплом бағдарламаларының студенттеріне арналған Welcome Day

Kozybayev University-де қос диплом бағдарламаларының бірінші курс студенттеріне арналған Welcome Day Dual Degree Students 2026 салтанатты рәсімі өтті. Бұл күн - студенттердің халықаралық білім жолындағы алғашқы қадамын жасап, екі университеттің үлкен академиялық отбасының бір бөлігіне айналған ерекше сәті.

Салтанатты шара студенттердің жарқын флешмобымен және қазақ және ағылшын тілдеріндегі құттықтаулармен басталды. Бірінші курс студенттерімен бірге бұл маңызды сәтті университет басшылығы, оқытушылар, түлектер және University of Arizona өкілдері бөлісті.
Петропавлға Arizona International ұйымының Орталық және Оңтүстік Азия бағытындағы аға директоры Рики Салазар бастаған University of Arizona делегациясы келді. Делегация құрамында университеттің академиялық бөлімдерінің өкілдері - доктор Саманта Орчард, доктор Сара Рефи Хайнд, Лорен Финдлоу, Минь Джоу және Джейн Комден болды.

Студенттерге арналған бейнеқұттықтауларын ҚР Ғылым және жоғары білім вице-министрі Гүлзат Көбенова және АҚШ-тың Қазақстандағы Елшісі Джули М. Стаффт жолдады.
Kozybayev University Басқарма төрағасы - ректор Ербол Исакаев бірінші курс студенттеріне халықаралық білім беру мүмкіндіктерін тиімді пайдаланып, білімдерін дамытуға, жаңа жобаларды жүзеге асыруға және өздерінің табыс тарихын қалыптастыруға тілектестігін білдірді.
Шараның ерекше сәті - қос диплом бағдарламасының символикалық сертификаттары мен брендтік сыйлықтарын табыстау рәсімі болды. Жаңа студенттерді University of Arizona өкілдері және алғашқы қабылдау түлектері — Кристина Борисова мен Амир Агзамов құттықтап, оқу тәжірибелерімен бөлісті.
Бүгінде қос диплом бағдарламалары келесі бағыттар бойынша жүзеге асырылуда: ақпараттық технологиялар; биотехнология; бизнес және менеджмент; педагогикалық бағыттар.

Kozybayev University мен University of Arizona арасындағы серіктестік 2022 жылы басталды. Төрт жыл ішінде бұл ынтымақтастық ауқымды академиялық платформаға айналды:
- 1500-ден астам студент серіктестік бағдарламалары бойынша білім алуда;
- қос диплом бағдарламасы студенттерінің саны 2022 жылғы 42 студенттен бүгінде 475 студентке дейін артты;
- алғашқы 31 түлек екі университеттің дипломын иеленді.Биыл университетке шамамен 3000 жаңа студент қабылданды, ал білім алушылардың жалпы саны 8000-нан асты. Қазіргі таңда Kozybayev University-де әлемнің 24 елінен келген жастар білім алуда.

Dual Degree отбасы, қош келдіңіздер!