Kozybayev University пен Harvest Agro СҚО агроөнеркәсіптік кешеніне кадр даярлайды

Мемлекет басшысы Қасым-Жомарт Тоқаев агроөнеркәсіптік кешенді технологиялық жаңғырту, цифрлық шешімдерді енгізу және су ресурстарын тиімді пайдаланудың қажеттілігі жайында айтқан болатын. Бұл үшін салаға агрономия, инженерия, биотехнология және цифрлық технологиялар тоғысында жұмыс істейтін мамандар қажет.

Қазіргі заманғы агроөнеркәсіптік кешен үшін мұндай кадрларды қалай даярлау керектігі Kozybayev University мен «Харвест Агро Холдинг» ЖШС өкілдерінің университетке сапары барысында талқыланды.

Harvest Agro – өсімдік шаруашылығы және заманауи агротехнологиялар саласында жобаларды дамытып келе жатқан халықаралық компания. Компания әлемнің 35-тен астам елінде жұмыс жүргізіп, Қазақстандағы өндірістік қызметін дамытып келеді.

Kozybayev University мен Harvest Agro арасындағы ынтымақтастық саланың нақты қажеттіліктеріне сай мамандар даярлауға бағытталатын болады. Тараптар студенттерге арналған практикалар мен тағылымдамаларды, бірлескен зерттеулерді дамытып, бизнес өкілдерін дипломдық және магистрлік жобалардың тақырыптарын қалыптастыруға тартуды жоспарлап отыр.

«Біз аграрлық кәсіпорындардың міндеттері дипломдық және магистрлік жобалардың негізіне айналып, оларды шешумен агрономдар, технологтар, IT-мамандар мен ғалымдардан құралған пәнаралық командалар жұмыс істегенін қалаймыз. Мұндай тәсіл студенттерге оқу барысында нақты өндірістік мәселелермен жұмыс істеуге мүмкіндік береді», – деп атап өтті М.Қозыбаев атындағы СҚУ ректоры Ербол Исақаев.

Тараптар топырақ пен суды талдау, суармалы егіншілік, цифрлық мониторинг және өсімдік шаруашылығының тиімділігін арттыру бағыттарында жобаларды жүзеге асыруды жоспарлап отыр.

«Біздің міндетіміз – алдағы бес жылда Қазақстанның 12 өңірінде 60 жобаны жүзеге асыру. Ол үшін агротехнологияларды, инженерлік шешімдерді, биоинженерия мен жасанды интеллектіні түсінетін мамандар қажет. Сондықтан Қазақстанның ішінде кадрлық және сараптамалық әлеуетті қалыптастыру және жаңа құзыреттерді дамытып жатқан университеттермен жұмыс істеу маңызды», – деп атап өтті «Харвест Агро Холдинг» ЖШС HR-директоры Жанар Қапенова.

Компания өкілдері университеттің зертханаларымен танысып, ауыл шаруашылығы өндірісіне арналған бірлескен ғылыми-қолданбалы жобалардың перспективаларын талқылады

Тағы бір бағыт Kozybayev University, Harvest Agro және University of Arizona, оның ішінде Arizona Genomics Institute арасындағы бірлескен зерттеулерді дамыту болмақ. Институт директоры, әлемге танымал ғалым Род Винг әріптестерімен геномика, биотехнология, өсімдік шаруашылығы және жасанды интеллект салаларындағы жобалардың мүмкіндіктерін талқылады.

Кездесу қорытындысы бойынша Kozybayev University мен «Харвест Агро Холдинг» ЖШС ынтымақтастық туралы меморандумға қол қойды.