Қозыбаев университетінде функционалдық геномика және биоинформатика бойынша халықаралық мектеп аяқталды

Kozybayev University-де функционалдық геномика және биоинформатика бойынша үшінші Халықаралық мектеп өз жұмысын аяқтады.

Оны Kozybayev University Агрокомпетенциялар орталығы АҚШ-тағы Аризона университетінің Arizona Genomics Institute (Аризона геномикасы институтымен) бірлесіп ұйымдастырды.

Биылғы мектепке 11 қатысушы – Kozybayev University оқытушылары мен студенттері, сондай-ақ Қазақ егіншілік және өсімдік шаруашылығы ғылыми-зерттеу институтының, Генетика және физиология институтының, Өсімдіктер биологиясы және биотехнологиясы институтының, Ұлттық аграрлық ғылыми-білім беру орталығының және Ахмет Байтұрсынұлы атындағы Қостанай өңірлік университеті жанындағы Инновациялық технологиялар ғылыми-зерттеу институтының зерттеушілері мен мамандары қатысты.

Сабақтарды профессор Андреа Дзукколо - Kozybayev University Халықаралық кампусы мен Италиядағы Сант-Анна жоғары мектебінің оқытушысы, доктор Мара Микулан – Король Абдалла атындағы ғылым және технология университетінің (KAUST, Сауд Арабиясы) маманы және профессор Род Винг - Аризона университетінің Arizona Genomics Institute директоры өткізді.

Биыл алғаш рет бағдарламаға GWAS (геном бойынша ассоциацияларды толық зерттеу) практикалық модулі енгізілді. Бұл әдіс өсімдіктердің өнімділігіне, дән сапасына және төзімділігіне байланысты генетикалық факторларды анықтауға мүмкіндік береді.

Қатысушылар күріш геномының нақты деректерімен жұмыс істеді: геномды жинақтап, аннотациялады, генетикалық тізбектерді талдады және геномдық талдаудың заманауи құралдарын меңгерді.

Үш мектептің қорытындысы бойынша Қазақстаннан және басқа елдерден 35 маман мен жас зерттеуші білім алды.

Бүгінде Kozybayev University Агрокомпетенциялар орталығы агрогеномика, геномдық және жеделдетілген селекция бағыттарын дамытып келеді. Мектеп аясында мамандар даярлау – осы жұмыстың маңызды бөлігі әрі заманауи ғылымды дамытуға және Қазақстанның азық-түлік қауіпсіздігін қамтамасыз етуге қосылған үлес.