Агросалаға кадр даярлау: СҚО-да мектеп, университет және бизнес бірігеді
Солтүстік Қазақстан облысында агроөнеркәсіптік кешенге кадр даярлауға бағытталған ауқымды жоба қолға алынуда. Облыс әкімінің тапсырмасына сәйкес, өңірдің жеті ауданында сегіз агросынып ашылады. Олар болашақ аграр мамандарды кәсіби даярлаудың алғашқы баспалдағына айналады.
Жобаның негізгі серіктесі – М. Қозыбаев атындағы Солтүстік Қазақстан университеті. Университет облыстық білім басқармасы, ауыл шаруашылығы басқармасы, ауыл шаруашылығы кәсіпорындары және ғылыми ұйымдармен бірлесіп, оқушыларға жоғары оқу орнына түспей тұрып-ақ заманауи агросаламен танысуға мүмкіндік беретін оқу бағдарламаларын әзірледі.
«Бүгінде ауыл шаруашылығы саласы қарқынды өзгеріп келеді. Цифрлық технологиялар, автоматтандыру және жасанды интеллект жүйелері енгізілуде. Мұның барлығы жаңа буын мамандарын қажет етеді. Олар тек базалық біліммен шектелмей, заманауи өндірістік процестерді де түсінуі керек. Сондықтан кәсіби бағдар беру жұмыстарын мүмкіндігінше ерте бастаудың маңызы зор», - деді М. Қозыбаев атындағы СҚУ ректоры Ербол Исакаев.
Агросыныптар ауыл шаруашылығына қызығушылық танытатын және болашақта осы саламен байланысты мамандық таңдауды жоспарлайтын 6-11 сынып оқушылары үшін тәжірибеге бағытталған алаң ретінде жұмыс істейді.
Оқушылар агрономия, мал шаруашылығы, ветеринария, өсімдіктерді қорғау негіздерін оқып, заманауи агротехнологиялармен танысады. Сонымен қатар кәсіпорындарға барып, агросала мамандарының күнделікті жұмысы туралы нақты түсінік алады.
Алғашқы қадамдардың бірі Мағжан Жұмабаев ауданында жасалды. Жуырда мұнда аудан әкімдігі, М. Қозыбаев атындағы СҚУ, Солтүстік Қазақстан облысының білім басқармасы, «СК Агро 2050» ЖШС және Солтүстік Қазақстан ауыл шаруашылығы ғылыми-зерттеу институтының қатысуымен агросынып ашу туралы меморандумға қол қойылды.
Жобада бизнестің қатысуына ерекше мән беріліп отыр. Ауыл шаруашылығы кәсіпорындарының өндірістік алаңдары оқушылардың тәжірибелік білім алып, заманауи өндіріс үдерістерімен танысуына мүмкіндік береді.
Мәселен, «Мал шаруашылығы өнімдерін өндіру технологиясы» білім беру бағдарламасының студенттері «СК Агро 2050» ЖШС-нің инновациялық тауарлы-сүт фермасына барып, заманауи сүт өндірісінің ұйымдастырылуымен, қолданылатын құрал-жабдықтармен және технологиялық процестермен танысты.
М. Қозыбаев атындағы СҚУ ректоры Ербол Исакаевтың айтуынша, жобаның негізгі міндеттерінің бірі – үздіксіз білім беру траекториясын қалыптастыру. Яғни: мектеп → агросынып → кәсіпорындағы тәжірибе → университет → өндіріс.
«Мектепті аяқтаған кезде жас адам өзі таңдаған мамандықты, оған қажетті құзыреттерді және алған білімін қай жерде қолдана алатынын түсінуі керек. Агросыныптар осы таңдауды саналы түрде жасауға мүмкіндік береді», – деп атап өтті ректор.
Жоба аясында М. Қозыбаев атындағы СҚУ агросынып оқушылары үшін шеберлік сабақтарын, ғылыми-тәжірибелік сабақтарды, сондай-ақ отандық және шетелдік оқытушылардың қатысуымен қысқы және жазғы мектептер ұйымдастыруды жоспарлап отыр. Сонымен қатар оқушыларға университетте білім алу мүмкіндіктері таныстырылады.
Жобаға қатысушылар үшін қосымша қолдау шаралары да қарастырылған. Атап айтқанда, университет сәуір айында агросынып оқушылары арасында алғашқы олимпиада өткізуді жоспарлап отыр. Оның жеңімпаздары М. Қозыбаев атындағы СҚУ-дың білім гранттарына, сондай-ақ басқа да қолдау шараларына ие болады. Олардың қатарында ауылдық жерлерден келген жастар үшін жатақхана ақысына жеңілдіктер де бар.
Агросыныптар Тайынша ауданында, Ғабит Мүсірепов ауданында, Есіл, Қызылжар, Мағжан Жұмабаев, Аққайың және Мамлют аудандарында ашылады.
Ауыл шаруашылығы экономиканың негізгі салаларының бірі саналатын Солтүстік Қазақстан үшін бұл жобаның стратегиялық маңызы зор. Өңірде ауқымды жер ресурстары бар және заманауи агроөндірістер белсенді дамып келеді. Бұл салаға білікті мамандар қажет.
Агросыныптарды құру оқушылардың аграрлық мамандықтарға қызығушылығын арттырып қана қоймай, технологиялық, цифрлық және инновацияларға бағытталған ауыл шаруашылығының жаңа буыны үшін кадрлық резерв қалыптастыруға мүмкіндік береді.
Агросыныптар жобасы Қазақстанда мектеп оқушыларын аграрлық салада жұмыс істеуге ерте кезеңнен кешенді түрде даярлаудың алғашқы форматы болып отыр. Бұл бастама өңірдегі және жалпы елдегі агроөнеркәсіптік кешеннің кадрлық әлеуетін дамыту бағытындағы жаңа қадамға айналмақ.
