Kozybayev University студенті Наталья Богданова Азия ойындарында қола медаль иеленді
Қазақстандық боксшы Наталья Богданова Жапонияда өтіп жатқан Азия ойындарында тағы да жеңіс тұғырына көтерілді. Бұл - спортшының осындай беделді халықаралық додадағы екінші жүлдесі. 2022 жылы Ханчжоуда өткен Азия ойындарында да ол қола медаль жеңіп алған болатын. Сол кезде Наталья 66 келіге дейінгі салмақ дәрежесінде өнер көрсетті.
Бұл жолы Наталья 75 келіге дейінгі салмақта бақ сынады. Жартылай финалда 27 жастағы әлем чемпионы Үндістан өкілі Ловлина Боргохайнмен кездесіп, 2:3 есебімен жеңіліп қалды. Жекпе-жектен кейін спортшы жаңа салмақ дәрежесінде алғаш рет өнер көрсетіп жатқанын айтып, бұл санатқа әлі де бейімделуі қажет екенін атап өтті.
Наталья Богданова - Kozybayev University-дің Дене шынықтыру және спорт кафедрасының ФКС-25 тобының 2-курс студенті. Ол академик М. Қозыбаев атындағы грант бойынша білім алуда. Аталған грант оған спорттағы елеулі жетістіктері үшін берілген.
Айта кетейік, университетте Натальяның жекпе-жегін тікелей эфирден тамашалау үшін арнайы аудитория ұйымдастырылды. Студенттер мен оқытушылар спортшының өнерін бірге тамашалап, оған қолдау көрсетіп, жеңісіне шын жүректен тілек білдірді.
Университет ұжымы даңқты чемпионды Азия ойындарындағы жүлдесімен құттықтайды! Біз сізбен мақтанамыз! Алдағы уақытта да жаңа жеңістер мен биік спорттық жетістіктер тілейміз!