Қорытынды, марапаттар және ұрпақтар сабақтастығы: Kozybayev University-де ардагерлер, ұстаздар мен қызметкерлерге құрмет көрсетілді

Университет қабырғасында Жоғары білім беру қызметкерлері күні, Қарттар күні және Ұстаздар күні аталып өтті.

Салтанатты шараның құрметті қонақтары – ұзақ жылдар бойы университет ұжымында еңбек етіп, жас мамандарды даярлауға өлшеусіз үлес қосқан ардагерлер болды. Салтанатты жиын басталмас бұрын ардагерлер үшін университет бойынша экскурсия ұйымдастырылып, дастархан жайылды.

Көп жылғы мінсіз еңбегі үшін бірқатар қызметкерлер мен оқытушылар Қазақстан Республикасы Ғылым және жоғары білім министрлігінің, Солтүстік Қазақстан облысы және Петропавл қаласы әкімдерінің марапаттарына ие болды. Сонымен қатар оларға Kozybayev University Басқарма төрағасы – ректордың Құрмет грамоталары мен Алғыс хаттары табысталды.

«Ана тілін дамытуға қосқан үлесі үшін» төсбелгісі «Журналистика және әлеуметтік ғылымдар» кафедрасының профессоры Мырзантай Жақыпқа табысталды.

ҚР Ғылым және жоғары білім министрлігінің «Жоғары және жоғары оқу орнынан кейінгі білім беру ісінің үздігі» төсбелгісімен ФИЦТ деканы Қайнижамал Икласова мен АФ деканы Алтын Шаяхметова марапатталды.

Ал ҚР Ғылым және жоғары білім министрлігінің «Ғылым үздігі» құрмет дипломы МК аға оқытушысы Владислав Семенюкке берілді.

«Тіл жанашыры» құрмет дипломына Foundation факультетінің оқытушысы Нұрбүбү Тұрсынғали ие болды.

Университет ректоры Ербол Исакаев өз сөзінде жоғары білім саласындағы әрбір жетістіктің артында оқытушылардың, ғалымдардың, басшылар мен университет қызметкерлерінің күнделікті еңбегі тұрғанын атап өтті.

«Жоғары білім саласындағы әрбір жетістіктің артында оқытушылардың, ғалымдардың, басшылар мен университет қызметкерлерінің күнделікті еңбегі тұр. Жоғары білім беру саласының ардагерлеріне айрықша алғысымды білдіргім келеді. Сіздер ұзақ жылдар бойы адал еңбек етіп, өз білімдеріңіз бен тәжірибелеріңізді кейінгі ұрпаққа жеткіздіңіздер, университет дәстүрлерін қалыптастырып, нығайтуға үлес қостыңыздар. М. Қозыбаев атындағы СҚУ-дың бүгінгі жетістіктерінде сіздердің еңбектеріңіздің де үлесі зор. Сіздер қалыптастырған берік негіздің арқасында университет бүгінде сенімді түрде дамып келеді. Оның нақты нәтижелерін көріп отырмыз. 2026 жылы университетке 2 955 адам оқуға қабылданды. Мұндай жоғары көрсеткіш соңғы рет 2004 жылы тіркелген болатын. Білім алушылардың жалпы саны шамамен 8 мыңға жетті. Бұл – 2011 жылдан бері алғаш рет тіркеліп отырған көрсеткіш», – деді Ербол Исакаев.

Университет ұжымының жүрегі – профессорлар мен оқытушылар. Ұстаздар – кейінгі ұрпаққа үлгі көрсететін, даналық пен әділдіктің символы. Олардың мойнында жастардың тағдыры мен болашағына қатысты үлкен жауапкершілік бар.

Kozybayev University Директорлар кеңесінің төрағасы Ғалым Байтук та ұжым мүшелерін мерекемен құттықтап, жоғары мектептің дамуындағы ұрпақтар сабақтастығының маңызын атап өтті.

«Жоғары мектеп қашанда ұрпақтар сабақтастығына сүйеніп келді және солай болып қала береді. Бұл – аға буынның даналығы мен тәжірибесі, жас әріптестердің энергиясы мен ізденісінің үйлесімі. Ардагерлерімізге зор денсаулық пен ұзақ ғұмыр тілеймін! Ал Солтүстік Қазақстан университетінің барлық ұжымына жаңа жетістіктер, талантты студенттер және оқу ордамызды мақтан тұтатын күндер көп болсын!» – деді Ғалым Байтук.

Шара барысында университеттің Директорлар кеңесінің мүшесі, оқу орнының ардақты ақсақалы Анатолий Башмаков университеттің қалыптасуы мен дамуының бастауында тұрған ұстаздарды, ғалымдарды, басшылар мен қызметкерлерді ерекше жылылықпен еске алды.

Мерекелік шараның көркін университеттің талантты студенттері одан әрі қыздырып, қатысушыларға музыкалық шығармаларын ұсынды.

Құрметті ардагерлер, қадірлі әріптестер!

Сіздерді осы жарқын қазан мерекелерімен құттықтаймыз! Еңбектеріңізге табыс, отбасыларыңызға амандық, шәкірттеріңізге білімге құштарлық пен биік мақсат тілейміз! Жан жылуыңызды айналаңызға сыйлап жүрген баршаңызға мықты денсаулық, бақыт және жаңа игі істерге күш-қуат тілейміз!