ЖИ-ден кейінгі университет: алда не істеу керек?

Астанада Kozybayev University Басқарма төрағасы – Ректор Ербол Исакаев пен академиялық мәселелер жөніндегі Басқарма мүшесі Айгүл Нұрпейісова «ЖИ-ден кейінгі университеттер: жаңа көшбасшылық, адами өлшем және Орталық Азия+ университеттерінің болашағы» тақырыбында өткен Rectors’ Club: Central Asia+ клубының 8-отырысына қатысты.

Жасанды интеллект тек академиялық технологияларды ғана емес, университеттердің моделін, миссиясын, білім беру бағдарламаларын, ғылыми-зерттеу қызметін, басқару жүйесін және индустриямен өзара іс-қимылын да өзгертіп жатыр.

Іс-шара барысында өзара байланысты екі негізгі тақырып талқыланды. Біріншісі – университеттің өзі қалай өзгеріп жатқаны: оның құрылымы мен білім беру бағдарламалары, ғылыми-зерттеу қызметі және индустриямен өзара байланысы. Екіншісі – жасанды интеллект интеллектуалдық міндеттерді барған сайын тиімді орындап жатқан кезде адам бойында қандай қасиеттерді сақтау және дамыту маңызды екені. Олардың қатарында өз бетінше ойлау, шешім қабылдау, шығармашылықпен айналысу және өз әрекеттері үшін жауапкершілік алу қабілеттері бар.

Университеттер өзгерістерге жай ғана бейімделіп қоймай, жаңа білім беру шындығын қалыптастыруға өздері де белсенді қатысуы қажет.

«Университеттердің болашағын тек технологиялар ғана емес, бүгін қабылдап жатқан шешімдеріміз де айқындайды», – деп атап өтті кездесуге қатысушылар.

Кездесу қорытындысы бойынша жоғары білім беруді жауапты, адамға бағдарланған және бірлескен трансформациялаудың негізгі бағыттарын айқындайтын
ЖИ-ден кейінгі университеттер туралы Астана AI декларациясы қабылданды.