Атақты спортшы Наталья Богданова Kozybayev University студенттерімен кездесті

Kozybayev University-де университетіміздің студенті, бокстан әлем чемпионы, Азия ойындарының екі дүркін қола жүлдегері Наталья Богдановамен кездесу өтті.

Іс-шараға Педагогикалық факультеттің студенттері – болашақ дене шынықтыру және спорт мұғалімдері, сондай-ақ студенттік белсенділер қатысты. Кездесу ашық диалог форматында өтті. Студенттер үлкен спорттық жарыстардың трансляциялары кезінде көп жағдайда назардан тыс қалатын тақырыптарға қатысты өздерін толғандырған сұрақтарын қойды.

Наталья өзінің жеке тәжірибесімен бөлісіп, рингке шығар алдындағы толқуды қалай жеңетіні, қиын сәттер мен жеңілістерді қалай өткеретіні, күнделікті жаттығуларға деген мотивацияны қайдан алатыны және кәсіби спорттағы мансабын оқумен қалай қатар алып жүргені туралы әңгімеледі.

Кездесуге Натальяның жеке бапкері, Kozybayev University түлегі, Қазақстан Республикасының бокстан еңбек сіңірген бапкері Дастан Қабденов те қатысты. Әңгіме жоғары нәтижеге жетуде тәлімгерлердің, отбасы мен команданың рөліне арналды. Өйткені олардың қолдауынсыз үлкен жетістіктерге жету мүмкін емес.

Kozybayev University спортта, ғылымда, білім алуда, шығармашылықта және қоғамдық қызметте жоғары нәтижелер көрсетіп жүрген талантты жастарды тұрақты түрде қолдап келеді. Еске сала кетейік, әлем чемпионатындағы жеңісінен кейін университет Натальяға оқу грантын ұсынған болатын. Ал бүгінгі кездесу барысында чемпионға магистратурада білім алу үшін жаңа грант табысталды.

Қазір Наталья Богданованың алдында жаңа әрі ауқымды мақсаттар тұр. 2027 жылдың сәуір айында Астанада ол Олимпиада лицензиясы үшін бақ сынайды. Ал спортшының басты мақсаты – 2028 жылы Лос-Анджелесте өтетін Олимпиада ойындарына қатысу.

Университеттің барша ұжымы Наталья Богданованың жетістіктерін мақтан тұтады және оған рингте де, білім алуда да сенімділік, күш-жігер және жаңа жарқын жеңістер тілейді!