Kozybayev University академиялық адалдық Лигасының жалпы жиналысын өткізді

7 қазанда Kozybayev University төрағалығымен Академиялық адалдық лигасы мүшелерінің Жалпы жиналысы онлайн форматта өтті.

Жиынды Лиганың Жалпы жиналысының төрағасы, Басқарма төрағасы – Kozybayev University ректоры Ербол Исакаев ашты. Ол Лиганың академиялық адалдық мәдениетін дамытудағы, жоғары білім сапасын арттырудағы және Қазақстанның академиялық қоғамдастығында бірыңғай құндылық бағдарларын қалыптастырудағы маңызды рөлін атап өтті. Сонымен қатар Академиялық адалдық лигасы Жобалық кеңсесінің жетекшісі Нұргүл Нұрлан құттықтау сөз сөйледі.

Күн тәртібіндегі негізгі мәселелердің бірі – Академиялық адалдық лигасының 2026–2027 оқу жылына арналған Жол картасының таныстырылымы болды. Құжатта жоғары оқу орындары арасындағы «Адалдық рецепті» шығармашылық байқауын, зерттеу адалдығы мәселелеріне арналған онлайн-сессияны, «Академиялық адалдық амбассадорлары» қысқы мектебін, академиялық адалдықты бұзу жағдайларын талдауға арналған практикумды, жасанды интеллект пен этика мәселелеріне арналған панельдік пікірталасты, сондай-ақ «Академиялық адалдық – заманауи университеттің стратегиялық ресурсы» қорытынды форумын өткізу көзделген.

Жиналысқа қатысушылар жоғары оқу орындары арасындағы ынтымақтастықты нығайтуға, үздік тәжірибелермен алмасуға және академиялық адалдық қағидаттарын ілгерілетудің тиімді тетіктерін дамытуға бағытталған аталған іс-шараларды қолдады.

Жиын барысында жоғары білім беру ұйымдарының Лига құрамына кіру туралы өтініштері де қаралды.

Жалпы жиналыс кәсіби диалог орнатуға, тәжірибе алмасуға және жоғары білім беру ұйымдарының адалдық, жауапкершілік пен ашықтық қағидаттарын ілгерілету жолындағы күш-жігерін біріктіруге мүмкіндік берген маңызды алаңға айналды.

Kozybayev University барлық қатысушыларға мазмұнды баяндамалары, сындарлы пікірталасы және академиялық адалдықтың ортақ құндылықтарын қолдағаны үшін алғысын білдіреді.