Қазақстанда Young Health Programme халықаралық бағдарламасы іске қосылды: алғашқы алаң - Kozybayev University
Бағдарлама халықаралық AstraZeneca биофармацевтикалық компаниясы мен Just Support жеке қорының қолдауымен жүзеге асырылады. Бір жыл ішінде білім беру және профилактикалық іс-шаралар өткізу, мамандардың кәсіби құзыреттерін дамыту, сондай-ақ студенттерді салауатты өмір салтын насихаттауға тарту жоспарланған.
Бағдарламаның салтанатты ашылу рәсіміне Қазақстандағы Ұлыбритания және Солтүстік Ирландия Біріккен Корольдігінің Төтенше және Өкілетті елшісі Салли Джейн Аксуорси, Қазақстандағы Швеция Корольдігінің Төтенше және Өкілетті елшісі Стефан Эрикссон, AstraZeneca компаниясы мен Just Support қорының өкілдері, университет басшылығы және Жүсіп Жұмағұлов бастаған Солтүстік Қазақстан облысы әкімдігінің өкілдері қатысты.
Қазақстан Республикасының Ғылым және жоғары білім министрі Саясат Нұрбек бағдарламаның іске қосылуына орай құттықтауын жолдап, халықаралық әріптестіктің және ғылым, білім беру мен денсаулық сақтау салаларындағы бірлескен бастамаларды дамытудың маңыздылығын атап өтті.
Ынтымақтастықтың жаңа кезеңі 2026 жылғы қаңтарда Қазақстанның Ғылым және жоғары білім министрі Саясат Нұрбек бастаған делегацияның Кембридждегі AstraZeneca Discovery Centre зерттеу орталығына сапарынан кейін басталды. Кездесу барысында тараптар өзара түсіністік туралы меморандумға қол қойып, аурулардың алдын алу, оларды ерте диагностикалау және халықаралық білім беру бастамаларын дамыту бағыттарын басым міндеттер ретінде белгіледі.
Бағдарлама жүрек-қан тамырлары ауруларының, онкологиялық аурулардың, қант диабетінің және тыныс алу мүшелерінің созылмалы ауруларының алдын алуды қамтиды. Әсіресе тамақтану ерекшеліктеріне, дене белсенділігіне және зиянды әдеттерге байланысты қауіп факторларына назар аударылады.
Kozybayev University ректоры Ербол Исакаевтың айтуынша, заманауи университеттің міндеті сапалы білім мен кәсіби дағдылар берумен ғана шектелмейді.
«Қазіргі университеттің міндеті - сапалы білім мен кәсіби құзыреттерді қалыптастыру ғана емес, сонымен қатар әрбір студент өзін қауіпсіз сезінетін, қажетті қолдау алып, физикалық және психологиялық денсаулығына қамқорлық жасай алатын жағдай жасау. Біз Young Health Programme бағдарламасын университет жұмысының деңгейін жаңа сатыға көтеруге, кәсіби мүмкіндіктерімізді арттыруға және жастардың өздерін денсаулық мәдениетін қалыптастыру үдерісіне тартуға мүмкіндік беретін бастама ретінде қарастырамыз», - деді Ербол Исакаев.
Университетте UniMed медициналық клиникасы мен психологиялық қызмет жұмыс істейді. Сонымен қатар бесінші жыл қатарынан студенттердің психологиялық клубы дамып келеді. Жаңа бағдарлама қолданыстағы ресурстарды халықаралық тәжірибемен ұштастырып, профилактикалық жұмыстың аясын кеңейтуге мүмкіндік береді.
Қазақстандағы Ұлыбритания және Солтүстік Ирландия Біріккен Корольдігінің Төтенше және Өкілетті елшісі Салли Джейн Аксуорси Қазақстан мен Ұлыбритания арасындағы ынтымақтастық білім алмасу бағдарламаларынан бірлескен ғылыми зерттеулер мен инновациялық жобаларға қарай дамып келе жатқанын атап өтті.
«Kozybayev University-дің халықаралық ғылыми жобаларға қатысып, британдық академиялық серіктестермен ынтымақтастық орнатып отырғанын көру ерекше қуантады», - деді ол. Сондай-ақ дипломат жас ұрпақтың денсаулығын нығайтуға бағытталған бастамаға қолдау білдірді.
Қазақстандағы Швеция Корольдігінің Төтенше және Өкілетті елшісі Стефан Эрикссон цифрландыру мен технологиялардың қарқынды дамуы жағдайында жастардың алдында жаңа міндеттер мен сын-қатерлер пайда болып отырғанына назар аударды.
«Инновациялар, технологиялар мен цифрландыру үлкен мүмкіндіктер ашады. Сонымен қатар олар алдыңғы буындар бұрын кездеспеген жаңа сын-қатерлерді де туындатады. Сондықтан жас кезден бастап физикалық және психологиялық саулық туралы, сондай-ақ болашақтағы өмір сапасына әсер ететін әдеттер жайында ойлану маңызды», - деп атап өтті дипломат.
AstraZeneca компаниясының Қазақстандағы бас директоры Елена Трогова тұрақты өзгерістердің негізінде қолжетімді білім, практикалық дағдылар және жастардың өздерінің белсенді қатысуы жатқанын айтты.
«Жастардың біліміне, дағдыларына және бастамаларына инвестиция салу арқылы олардың ерте жастан өз денсаулығына саналы түрде қамқорлық жасауына, жұқпалы емес аурулардың даму қаупін төмендетуіне және өз қауымдастықтарындағы оң өзгерістердің бастамашысы болуына көмектесуді көздейміз. Just Support қорымен әріптестік бағдарламаның халықаралық тәжірибесін Қазақстан жастарының қажеттіліктерін түсінумен ұштастыруға және профилактикалық жұмыстың тұрақты негізін қалыптастыруға мүмкіндік береді», - деді Елена Трогова.
Just Support қорының атқарушы директоры Светлана Богатырева денсаулық туралы ақпарат берумен шектелмей, жастарға күнделікті әдеттердің өмір сапасына қалай әсер ететінін түсіндіру маңызды екенін атап өтті.
«Біз үшін денсаулық туралы жай ғана айту емес, жастардың күнделікті шешімдері мен әдеттері бүгінгі және болашақтағы өмір сапасына қалай әсер ететінін түсінуіне көмектесу маңызды. Бағдарламаның жаһандық тәжірибені Қазақстан жастарының қажеттіліктерімен және білім беру ортасының ерекшеліктерімен ұштастыратыны ерекше құнды», - деді Светлана Богатырева.
Бағдарламаның ашылу күні Kozybayev University мен Just Support қоры ынтымақтастық туралы меморандумға қол қойды. Құжат профилактикалық және ағартушылық бастамаларды жүзеге асыру, денсаулық мәдениетін дамыту және жастардың әл-ауқатын нығайту бағыттарындағы бірлескен жұмыстың негізін бекітеді.
Солтүстік Қазақстан облысы әкімінің орынбасары Жүсіп Жұмағұлов жобаның өңір мен жалпы ел үшін пилоттық маңызы бар екенін атап өтті.
«Біз бұл жобаны университет базасында жастардың денсаулық сақтау, аурулардың алдын алу және салауатты өмір салтын насихаттау саласындағы құзыреттерін қалыптастыруға арналған заманауи алаң құру мүмкіндігі ретінде қарастырамыз. Бұл үдерісте пайдалы тәжірибелерді таратушы ретінде жастардың өздері шешуші рөл атқаруы тиіс», - деді Жүсіп Жұмағұлов.
Облыс әкімдігі жобаны іске асыруға, сондай-ақ мемлекеттік органдардың, білім беру және денсаулық сақтау ұйымдарының өзара іс-қимылын үйлестіруге қолдау көрсетуге дайын.
Бағдарламаны жүзеге асыруға AstraZeneca компаниясы Just Support қоры арқылы 60 миллион теңге бағыттауды жоспарлап отыр. Қаражат білім беру іс-шараларын өткізуге, профилактикалық акцияларды ұйымдастыруға, мамандардың біліктілігін арттыруға, зерттеу жұмыстарын жүргізуге және жастармен жұмыс істеуге арналған практикалық құралдарды дамытуға жұмсалмақ. Сонымен қатар өңірде профилактикалық және диагностикалық жұмыстардың мүмкіндіктерін кеңейту мақсатында жылжымалы зертхана іске қосу мәселесі қарастырылып жатыр.
Бағдарлама нәтижелері студенттерді қамту және олардың белсенділік деңгейі, қауіп факторлары туралы хабардарлықтың өзгеруі, сондай-ақ қолдау қызметтеріне деген сұраныс көрсеткіштері бойынша бағаланады. Алдағы уақытта тиімділігі дәлелденген тәжірибелерді университеттен тыс жерлерде - Петропавл қаласының және Солтүстік Қазақстан облысының білім беру әрі әлеуметтік ортасында тарату көзделіп отыр.
Young Health Programme бағдарламасы әлемнің 60-тан астам елінде жүзеге асырылады. Kozybayev University базасында бағдарламаның іске қосылуы халықаралық әріптестіктің жаңа кезеңіне жол ашып, жастардың денсаулығы мен әл-ауқатын нығайту жолында университеттің, бизнестің, қордың және өңірлік билік органдарының мүмкіндіктерін біріктіреді.
