Kozybayev University жоғары білім беру қызметкерлері күніне арналған форумға қатысты

15 қазанда Астана қаласындағы Qazaq AI Research University (QAIRU) алаңында Жоғары білім беру қызметкерлері күніне арналған форум өтті.

Іс-шараға М. Қозыбаев атындағы Солтүстік Қазақстан университетінің Басқарма төрағасы – ректоры Ербол Исакаев және әлеуметтік-мәдени даму жөніндегі Басқарма мүшесі Әділхан Төлепберген қатысты.

Форум Қазақстанның жоғары білім беру жүйесін дамытудың негізгі бағыттарын талқылау үшін ҚР Ғылым және жоғары білім министрлігінің өкілдерін, жоғары оқу орындарының басшыларын, ғалымдар мен сарапшыларды біріктірді.

Жиын барысында ҚР Ғылым және жоғары білім министрі Саясат Нұрбек сөз сөйледі. Талқылаудың негізгі тақырыптары университеттерді цифрлық трансформациялау, жасанды интеллектіні енгізу және AI SANA ұлттық қозғалысын дамыту, білім сапасын арттыру, ғылым мен халықаралық ынтымақтастықты дамыту мәселелеріне арналды.

Форумның іскерлік бағдарламасы аясында Ғылым және жоғары білім вице-министрі Динара Щеглова, министрліктің бейінді комитеттері төрағаларының орынбасарлары Ақерке Абылайхан, Жанна Есинбаева, Наужан Дидарбекова және Ренат Елшібеков те сөз сөйледі.

Спикерлер AI SANA бастамасын дамыту, студенттерді қоғамға бейімдеу, жоғары білім беру мазмұнын жетілдіру, жоғары оқу орындарын қаржыландыру және Қазақстанның ғылыми-инновациялық саясаты мәселелері бойынша өзекті тәсілдерді ұсынды.

Ұлттық тестілеу орталығының директоры Нұрсейіт Байжанов білім алушылардың білімін бағалау құралы ретінде Ұлттық бірыңғай тестілеудің (ҰБТ) жаңа форматы туралы баяндады. QAIRU ректоры Сапар Тоқсанов жасанды интеллект дәуіріндегі университет моделін таныстырса, Жоғары білім беруді дамыту ұлттық орталығы директорының орынбасары Ботагөз Бермұхамбетова білім беруді интернационалдандыру және оның мазмұнын жетілдіру бағытындағы міндеттерді атап өтті. Университеттерде қауіпсіз әрі инклюзивті орта қалыптастыруға, студенттік бастамаларды қолдауға, волонтерлікті дамытуға және жастардың көшбасшылық қасиеттерін қалыптастыруға ерекше назар аударылды. Бағдарлама Maqsut Narikbayev University тәжірибесімен танысумен аяқталды. MNU-дың ғылым, инновациялар және жасанды интеллект жөніндегі Басқарма төрағасының орынбасары Сергей Пен жасанды интеллектіні университет қызметіне енгізу, яғни стратегия әзірлеуден бастап оны практикалық шешімдерде қолдануға дейінгі тәсілдермен бөлісті.

Форумға қатысу Kozybayev University өкілдеріне жоғары білім берудің болашағына қатысты кәсіби диалогқа қосылуға, әріптестерімен тәжірибе алмасуға және саланы дамытудың өзекті бағыттарымен танысуға мүмкіндік берді.

Форум аясында жоғары білім беру саласын дамытуға қосқан үлесі үшін сала өкілдерін марапаттау рәсімі өтті. ҚР Ғылым және жоғары білім министрлігінің «Жоғары білім беру саласына қосқан үлесі үшін» медалімен Kozybayev University Басқарма төрағасы – ректоры Ербол Исакаев марапатталды.

Бұл марапат – Kozybayev University ұжымының еңбегіне берілген жоғары баға. Күн сайын білім мен ғылымның дамуына үлес қосып жүрген оқытушылардың, ғалымдардың, қызметкерлердің және студенттердің еңбегі осы жетістіктің негізі болып табылады.