Қазақстан мен Қытай аграрлық білім мен ғылым саласындағы ынтымақтастықты нығайтуда
Қытай Халық Республикасындағы Солтүстік-Батыс ауыл және орман шаруашылығы университетінің (Northwest A&F University) 14 студенті 2026–2027 оқу жылының күзгі семестрінде М. Қозыбаев атындағы Солтүстік Қазақстан университетінің Агротехнологиялық факультетінде білім алуды бастады. Олар «Мал шаруашылығы өнімдерін өндіру технологиясы» білім беру бағдарламасы бойынша оқып, бейіндік пәндерді меңгеруде. Сонымен қатар факультеттің серіктес кәсіпорындары базасында өндірістік тәжірибеден өтеді.
Бағдарлама университет қабырғасындағы сабақтармен ғана шектелмейді. Студенттер Солтүстік Қазақстан өңіріндегі мал шаруашылығының ерекшеліктерімен де танысады. Олар жергілікті шаруашылықтардағы өндірістік үдерістердің қалай ұйымдастырылғанын көріп, алған білімдерін өз елінің тәжірибесімен салыстыра алады.
2026 жылғы қараша айында мал шаруашылығы саласында маманданатын Қытайдан тағы 7 магистранттың келуі күтілуде.
«Аграрлық білім беруде технологияларды меңгеріп қана қоймай, олардың нақты өндірістік жағдайда қалай қолданылатынын түсіну де маңызды. Академиялық ұтқырлық студенттерге екі елдің тәжірибесін салыстыруға, кәсіби білімдерін тереңдетуге және салалық міндеттерді шешудің жаңа тәсілдерімен танысуға мүмкіндік береді», – дейді Агротехнологиялық факультеттің деканы Алтын Шаяхметова.
Kozybayev University мен Northwest A&F University арасындағы ынтымақтастыққа он жыл толды. Осы уақыт ішінде академиялық ұтқырлық екі университет серіктестігінің тұрақты бағыттарының біріне айналды. Бүгінге дейін Қытайдан келген 100-ге жуық бакалавриат және магистратура студенті М. Қозыбаев атындағы СҚУ-дың Агротехнологиялық факультетінде білім алды.
Өз кезегінде, соңғы жылдары Kozybayev University-дің 60 студенті Қытайда «Агрономия», «Мал шаруашылығы өнімдерін өндіру технологиясы», «Орман ресурстары және орман шаруашылығы», «Азық-түлік өнімдерінің технологиясы», «Өсімдіктану және технологиялар» бағыттары бойынша білім алды.
2025 жылы Қытайға университеттің 35 білім алушысы барды. Олардың ішінде 2 магистрант қос дипломды білім беру бағдарламасы бойынша оқыса, 33 студент мал шаруашылығы мен агрономия бағыттары бойынша білім алды.
Жыл сайын оқытушылар серіктес университеттің инновациялық зертханаларында тағылымдамадан өтеді. Сондай-ақ серіктес жоғары оқу орнының ғалымдары мен сарапшылары шетелдік оқытушылар ретінде университет студенттеріне дәріс оқиды.
Бірлескен жобалар, оқытушылардың кәсіби тағылымдамалары мен ғылыми жарияланымдар зерттеу тәжірибесімен алмасуға, ғылыми құзыреттерді дамытуға және екі ел ғалымдарының өзара байланысын кеңейтуге мүмкіндік береді.
М. Қозыбаев атындағы СҚУ-дың Агротехнологиялық факультеті үшін бұл халықаралық тәжірибені оқу үдерісіне енгізуге, болашақ мамандардың практикалық даярлығын жетілдіруге және агроөнеркәсіптік кешеннің өзекті міндеттеріне бағытталған ғылыми зерттеулерді дамытуға жол ашады.
Осылайша, Kozybayev University мен Northwest A&F University аграрлық кадрларды даярлау, академиялық ұтқырлық пен ғылыми қызметті ұштастыра отырып, өзара ынтымақтастықты жүйелі түрде дамытып келеді.
