Университетке Әбіш Кекілбаевтың кітаптары табысталды

Белгілі қазақстандық жазушы Әбіш Кекілбаевтың кітаптары «Банк ЦентрКредит» АҚ-ның қолдауымен Қозыбаев университеті кітапханасының қорына табысталды.

Жазушының XVIII ғасырдағы қазақ халқының өмірі мен тарихи оқиғаларын арқау еткен « Елең-алаң» тарихи романының 50 данасы енді университет қауымдастығының игілігіне ұсынылды. ЖОО кітапханасының директоры Асия Ермишева атап өткендей, Әбіш Кекілбаевтың шығармалары оқырмандар арасында үлкен сұранысқа ие. Алайда кітапхана қорында бұл романның жеке басылымы бұрын болмаған. Ал жаңа басылым кітаптың толық авторлық нұсқасы болып табылады.

«Біздің банк еліміз бойынша кітаптың 8100-ге жуық данасын қайта басып шығарды. Еліміздің жоғары оқу орындарына тарату үшін Ғылым және жоғары білім министрлігіне берілді. Бұл шығарма халқымыздың тарихи даму жолын баяндайды және отандық әдебиетте маңызды орын алады », – деді «Банк ЦентрКредит» АҚ Петропавл қаласындағы филиалының директоры Рустам Аюлов.

Салтанатты шараға жазушының немересі, Петропавл халықаралық әуежайының директоры Абыл Кекілбаев қатысты. Әбіш Кекілбаевтың шығармашылығы қазақ әдебиеті мен мәдениетінің ажырамас бөлігіне айналды. Оның туындылары халқымыздың тарихын, ұлттық құндылықтарын және рухани байлығын терең түсінуге мүмкіндік береді.

«Берілген кітаптар жинағы студенттерге халқымыздың тарихын, құндылықтары мен рухани бағдарларын тереңірек тануға мүмкіндік береді. Негізі банк университеттің дамуына белсенді атсалысып келеді. Соңғы 3 жылда  инфрақұрылымды жетілдіру бағытында ауқымды жұмыстар атқарылып, студент жастарға арналған жаңа кеңістіктер, сквер, спорт залдары ашылды», – деді  Басқарма Төрағасы-Ректор Ербол Исақаев.

Іс-шара үш ай бұрын кітапханада ашылған Қазақ тілі, мәдениеті және оқу орталығында өтті. Бүгінде бұл зал ұлттық рухани құндылықтар дәріптеліп, кеңінен насихатталатын маңызды мәдени кеңістікке айналды. Кітапхана қызметкерлері Әбіш Кекілбаевтың өмірі мен шығармашылығына арналған тақырыптық кітап көрмесін ұйымдастырды.