Университетте студенттер жатақханаларының қоныстануға дайындығына мониторинг жүргізілді

Жайлылық, қауіпсіздік, инфрақұрылым — оқу күні аяқталғаннан кейін студент үшін маңызды дүниелер. Бұл жай ғана уәде емес, нақты стандарт болуы тиіс. Сондықтан жаңа оқу жылы қарсаңында жатақханалардың дайындығы жан-жақты тексерілді.
Мониторингке №1 емхананың сыбайлас жемқорлыққа қарсы комплаенс маманы Ерлан Абилкаримов, «Саналы Ұрпақ» жобалық кеңсесінің өкілі Ажар Балахметова және Kozybayev University студенттік омбудсмені Наргиз Қырғызбай қатысты.
 Басқарма мүшесі Әділхан Төлепберген коменданттармен бірге мониторинг тобына 360 орынға арналған №3 «Достық», 258 орындық №10 «Бірлік» жатақханаларын, сондай-ақ 1200 орынға арналған «Шаңырақ» және «Ынтымақ» жатақханаларын таныстырды.Қауіпсіздік ғимаратқа кіреберістен басталады: жатақханаларға кіру Face ID жүйесі арқылы жүзеге асырылады.

Ал әрі қарай студенттердің жайлы өмір сүруіне қажетті барлық жағдай қарастырылған:
- жаңартылған тұрғын бөлмелер
- заманауи душ және жуыну бөлмелері
- санитарлық тораптар мен кір жуатын орындар
-  жаңартылған асүй аймақтары
-  өздігінен дайындалуға арналған бөлмелер
- коворкинг кеңістіктері
- үстел теннисі аймағы
-  тренажер залдары.
Жаңа оқу жылы қарсаңында жатақханаларда ауқымды жөндеу жұмыстары жүргізілді: душ кабиналары жаңғыртылып, асүй аймақтары, дәліздер, санитарлық тораптар, жуыну және тұрғын бөлмелер жаңартылды.

 Мониторинг қорытындысы бойынша Kozybayev University жатақханалары студенттерді қабылдауға толық дайын.
Жаңа оқу жылы жаңа біліммен ғана емес, өмір сүріп, білім алып, достасып, студенттік жарқын естеліктер қалыптастыратын жаңа кеңістіктен басталады. 
Қош келдіңіздер, студенттер! Жатақхана - сіздердің екінші үйлеріңіз!