Мемлекеттік органдардағы мансап: студенттерге жұмысқа орналасу мүмкіндіктері таныстырылды
Kozybayev University-дің соңғы курс студенттеріне арналған кездесуде ҚР Мемлекеттік қызмет істері агенттігінің Солтүстік Қазақстан облысы бойынша департаменті өкілдерімен жүздесу ұйымдастырылды. Кездесу барысында қалалық басқармалар мен облыс аудандары әкімдіктерінің мамандары төртінші курс студенттерімен мемлекеттік қызметке орналасу мәселелерін талқылады. Студенттерге мемлекеттік органдарға жұмысқа орналасу тәртібі, жас мамандардың «Дипломмен - ауылға!» бағдарламасына қатысу мүмкіндіктері және Жас мемлекеттік қызметшілер мектебінің жұмысы туралы ақпарат берілді.
«Қазақстан Республикасының Президенті тиімді әрі кәсіби мемлекеттік аппарат қалыптастыру аясында мемлекет дамуына өз үлесін қоса алатын дарынды жастарды мемлекеттік қызметке тартуға ерекше көңіл бөліп келеді. Конкурстық іріктеулерге жастардың қатысуы жыл сайын артып келеді. Облыста шамамен 4 мың мемлекеттік қызметші еңбек етеді, олардың 30%-ы 35 жасқа дейінгі жастар.
Мемлекеттік қызметке орналасу үшін азаматтар конкурстық іріктеуден өтеді. Қазіргі таңда конкурс рәсімі жеңілдетіліп, онлайн форматта өткізіледі. Бұл мемлекеттік қызметке барша азаматтардың тең жағдайда орналасуына мүмкіндік береді.
2023 жылдан бастап оқу үлгерімінің GPA көрсеткіші 3,33-тен төмен емес жоғары оқу орындарының түлектеріне «Б» корпусының жекелеген әкімшілік мемлекеттік лауазымдарына конкурстан тыс тағайындалу мүмкіндігі берілді. Облыс бойынша осындай талаптарға сәйкес келетін 38 түлек мемлекеттік қызметке тағайындалды», - деді ҚР Мемлекеттік қызмет істері агенттігінің Солтүстік Қазақстан облысы бойынша департаментінің басшысы Дархан Хайруллин.
Жас мемлекеттік қызметшілер мектебі ҚР Мемлекеттік қызмет істері агенттігінің Солтүстік Қазақстан облысы бойынша департаменті жанынан 2018 жылдан бері жұмыс істейді. Осы уақыт аралығында мектепке 200-ден астам студент қатысты. Олардың 20%-ы оқуын аяқтағаннан кейін мемлекеттік қызметке орналасты.
«Мемлекет басшысы бірнеше рет атап өткендей, Қазақстанға кәсіби, жауапты әрі бастамашыл мемлекеттік қызметшілер қажет. Заманауи білім мен құзыреттерге ие білікті жас кадрларды мемлекеттік қызметке тартудың маңызы зор.
Университет үшін түлектеріміздің сапалы білім алып қана қоймай, өздерінің кәсіби әлеуетін жүзеге асырып, өңір мен елдің дамуына үлес қосу мүмкіндігіне ие болғаны аса маңызды. 2025–2026 оқу жылының түлектерінің 38%-дан астамы мемлекеттік органдарда еңбек етіп жатыр. Олардың қатарында әкімдер аппараттары, әкімдіктердің басқармалары мен бөлімдері, полиция, прокуратура, мемлекеттік кірістер, мемлекеттік аудит органдары және басқа да мемлекеттік құрылымдар бар», - деп атап өтті Басқарма төрағасы - ректор Ербол Исакаев.
Іс-шара соңында студенттер Мемлекеттік қызмет мектебіне қатысуға өтінім беру үшін сауалнамалар толтыра алды. Сондай-ақ олар әлеуетті жұмыс берушілермен тілдесіп, мемлекеттік қызметке орналасу мүмкіндіктері, кандидаттарға қойылатын талаптар және кәсіби өсу перспективалары туралы толығырақ ақпарат алды.
