Инженерлік бағдарламаларды дамытудағы CDIO халықаралық тәжірибесі
Kozybayev University өкілдері Д. Серікбаев атындағы Шығыс Қазақстан техникалық университетінде өткен CDIO Asian Regional Meeting 2026 халықаралық іс-шарасына қатысты.
Кездесуде технологиялық трансформация жағдайында инженерлік білім беруді дамыту, CDIO тәсілдері, жоғары оқу орындарының индустриямен өзара ынтымақтастығы және жасанды интеллектіні қолдану мәселелері талқыланды.
CDIO әдістемесі инженерді инженерлік өнімді әзірлеудің толық цикліне дайындауға бағытталған. Яғни идеяны қалыптастыру мен жобалаудан бастап, әзірленген шешімді іске асыру және пайдалануға дейінгі барлық кезеңді қамтиды. Бұл тәсіл іргелі және кәсіби дайындықты жобалық қызметпен, командалық жұмыспен және практикалық міндеттерді шешумен ұштастыруға мүмкіндік береді.
Kozybayev University үшін CDIO саласындағы халықаралық тәжірибені зерделеу инженерлік және цифрлық бағыттар бойынша білім беру бағдарламаларын одан әрі дамыту тұрғысынан ерекше қызығушылық тудырады. Осындай бағыттардың бірі - әртүрлі білім беру бағдарламаларында оқитын студенттерді біріктіретін кешенді инженерлік жобаларды дамытуда CDIO элементтерін қолдану. Машина жасау, энергетика, автоматтандыру, ақпараттық технологиялар және жасанды интеллект бағыттарын өңірдегі нақты өндірістік міндеттерді шешуге бағытталған ортақ жобалар аясында біріктіруге болады.
Бұл тәсіл Kozybayev University жанындағы Озық инженерлік мектебін дамыту тұрғысынан да маңызды. Индустриялық серіктестер инженерлік міндеттерді қалыптастыруға қатысатын, студенттік командалар шешімдерді әзірлеудің толық циклінен өтетін, ал университет зертханалары жобалау, прототиптеу және сынақтан өткізу алаңдары ретінде пайдаланылатын модель перспективалы бағыттардың бірі бола алады.
