Плагиат пен көшіруге жол жоқ: Kozybayev University студенттер арасында академиялық адалдық мәдениетін қалыптастырады

Сыбайлас жемқорлыққа қарсы жұмыс - Kozybayev University қызметінің маңызды бағыттарының бірі. Университет еліміздегі академиялық адалдық лигасының құрамына алғашқылардың бірі болып енді. Университетте «Sanaly Urpaq» жобалық кеңсесі жұмыс істейді. Оның аясында студенттер арасынан сыбайлас жемқорлыққа қарсы қозғалыс белсенділерінің пулы қалыптастырылған. Сондай-ақ сыбайлас жемқорлыққа қарсы бағытта тұрақты түрде түрлі іс-шаралар өткізіліп тұрады.

Осындай іс-шаралардың бірі - бірінші курс студенттеріне арналған дәстүрлі «Адалдық сағаты» болды.

Іс-шараның спикерлері - Қазақстан Республикасы Мемлекеттік қызмет істері агенттігінің Солтүстік Қазақстан облысы бойынша департаменті Сыбайлас жемқорлықтың алдын алу басқармасының бас маманы Зейнегүл Құнанбаевa және университеттің Сыбайлас жемқорлыққа қарсы комплаенс-қызметінің басшысы Инна Джемалединова.

Студенттерге академиялық ортадағы сыбайлас жемқорлық тәуекелдері, сыбайлас жемқорлықтың алдын алу шаралары, академиялық адалдық қағидаттары және университетте қолданыстағы комплаенс тетіктері туралы ақпарат берілді.

«Адалдық әр адамның жеке таңдауынан басталады!» - деп атап өтті спикерлер студенттерге.

Кездесу барысында оқу жұмыстарын өз бетінше орындауға, көшіру мен плагиатқа жол бермеуге, сондай-ақ даулы жағдайлар туындаған кезде кеңес алу және көмекке жүгіну жолдарына ерекше назар аударылды.