Университет пен индустрия: кадр даярлаудан бірлескен дамуға дейін

Мықты өндірістің негізі – білікті мамандар. Ал білікті кадрлар университет пен индустрия өзара тығыз байланыста жұмыс істеген жерде қалыптасады. Осындай тәсіл Kozybayev University мен Бескөл елді мекеніндегі «Молсервис» сүт зауытының басын біріктіріп отыр.

Кездесу барысында университет командасы Басқарма төрағасы – ректор Ербол Исакаевтың жетекшілігімен кәсіпорын басшылығымен ынтымақтастықтың жаңа бағыттарын талқылады.

«Молсервис» ЖШС директоры Ғалибек Рамазанов университет өкілдеріне кәсіпорын аумағын таныстырып, өндірістегі технологиялық процестер мен кәсіпорынның алдағы даму жоспарлары туралы айтып берді.

Кездесудегі басты мәселе – болашақ өндіріс үшін қажетті мамандарды даярлау. Зауытта сүт өнімдерін өндіретін жаңа желіні іске қосу жоспарланып отыр. Осыған байланысты «Молсервис» университетті технолог мамандарды даярлаудағы стратегиялық серіктесі ретінде қарастырады.

Ынтымақтастықтың алғашқы нәтижелері қазірдің өзінде байқалады. Агротехнологиялық факультеттің студенттері кәсіпорында өндірістік тәжірибеден өтіп, сүтті өңдеу технологияларын меңгеруде. Сонымен қатар олардың болашақта осы кәсіпорында жұмысқа орналасуына мүмкіндік бар.

Айта кетейік, Ғалибек Рамазанов пен кәсіпорынның көптеген қызметкері – Kozybayev University түлектері. Енді олар университетке студент ретінде емес, басшы және индустриялық серіктес ретінде қайта оралып отыр.

Дегенмен бүгінгі ынтымақтастық тек маман даярлаумен шектелмейді. Келесі кезең – бірлескен даму. Оның ішінде өндірісті цифрландыру, IT-шешімдерді енгізу, ғылыми әзірлемелер мен инновацияларды дамыту бағыттары бар.

Осылайша, Kozybayev University мен «Молсервис» ЖШС өңір мен елдің дамуына үлес қосатын стратегиялық серіктестіктің жарқын үлгісін көрсетіп отыр.