Kozybayev University аграрлық сала мамандарын даярлаудың халықаралық бағдарламасын қорытындылады
Kozybayev University Вайенштефан-Триздорф қолданбалы ғылымдар университетімен (HSWT, Германия) және агробизнес өкілдерімен бірлесіп жүзеге асырылатын «Practical Trainee Triesdorf-Kasachstan» пилоттық жобасына қатысу үшін таңдалған Қазақстандағы екі жоғары оқу орнының бірі болды.
Бағдарламаның алғашқы қатысушылары болып «Өсімдіктану және технологиялар» білім беру бағдарламасының 3-4 курс студенттері Дамир Аманжол, Дәурен Манайдар, Нияз Сатыбалды және Арыстан Мұрзашев атанды. Төрт ай бойы олар аграрлық технологияларға, цифрландыруға және практикаға бағытталған мамандар даярлауға мамандандырылған Германияның жетекші қолданбалы ғылымдар жоғары оқу орындарының бірінде білім алды.
Бағдарлама аясында студенттер ауыл шаруашылығы өндірісін ұйымдастырудың заманауи тәсілдерін зерттеді. Оқытудың маңызды бөлігі ретінде далалық зерттеулерге шығу және практикалық жобалармен жұмыс істеу қарастырылды.
Студенттердің оқу, тұру және ұшу шығындарының барлығын, сондай-ақ айлық шәкіртақыларын «СТ АГРО» ЖШС компаниясы толығымен қаржыландырды. Қазақстанға оралғаннан кейін қатысушылар кәсіби даярлықты компанияның өндірістік алаңында жалғастырды. 5 тамыздан бастап студенттер Германияда алған білімдерін шынайы аграрлық өндіріс жағдайында қолдана отырып, өндірістік практикадан өтуде. Практика аяқталып, Kozybayev University дипломын алғаннан кейін бағдарлама қатысушылары «СТ АГРО» ЖШС-не үш жыл мерзімге жұмысқа орналасады.
«Бүгінде АӨК цифрландыру, заманауи өндіріс технологияларын енгізу және мамандардың кәсіби құзыреттілігіне қойылатын талаптарды арттыру жағдайында дамып келеді. Осындай жағдайда университет міндеті - жай ғана дипломы бар түлекті емес, заманауи технологиялармен жұмыс істей алатын, нақты өндірістік процестерді түсінетін және халықаралық тәжірибені Қазақстан жағдайында қолдана білетін маман даярлау», - деп атап өтті Басқарма төрағасы – ректор Ербол Исакаев.
Оның айтуынша, Kozybayev University студенттерінің «Practical Trainee Triesdorf-Kasachstan» бағдарламасына қатысуы Германияның жетекші білім беру орталарының бірінде оқу тәжірибесін алу мүмкіндігі ғана емес, сонымен бірге агроөнеркәсіптік кешен үшін заманауи кадрларды даярлаудағы әріптес ретінде университетке деген сенімнің көрсеткіші болды.
2026 жылдың күзінде Kozybayev University мен серіктестері келесі жылдың жазғы семестрінде Германияда оқу үшін студенттерді жаңадан іріктеуді бастайды.