Kozybayev University делегациясының Агробиологиялық станцияға сапары

Сапарға Басқарма төрағасы – ректор Ербол Исакаев, университет ғалымдары және ҚХР-дан келген агроном-маман Кун Бао қатысты.

Агробиологиялық станцияда магистрлік диссертациялар аясындағы зерттеулер, сондай-ақ Қытайдың Солтүстік-Батыс ауыл және орман шаруашылығы университетімен және Хэнань ауыл шаруашылығы инвестициялық корпорациясымен бірлескен сорт сынақтары жүргізілуде.

Ғалымдар дақылдардың бейімделгіштігі мен өнімділігін бағалап, Солтүстік Қазақстанның топырақ-климаттық жағдайларына барынша қолайлы әрі болашағы зор сорттарды анықтауда. Қазіргі таңда станцияда Қытай селекциясының 7 бидай, 5 жүгері, 3 зығыр, 2 күнбағыс, 5 рапс және 1 картоп сорты, сондай-ақ Хэнань тобының 18 жүгері және 4 бидай сорты сынақтан өткізілуде.

Зерттеулердің басты мақсаты – алынған нәтижелерді өңірдегі шаруашылықтарға тікелей енгізу, тұқым шаруашылығын дамыту, заманауи агротехнологиялар мен цифрлық шешімдерді кеңінен қолдану.

Зерттеу жұмыстарына Kozybayev University-нің оқытушылары, магистранттары мен студенттері де тартылып, «университет – ғылым – өндіріс» арасындағы тиімді байланыс қалыптасуда.

Аталған жұмыстар Мемлекет басшысы Қасым-Жомарт Тоқаевтың агроөнеркәсіптік кешенді дамыту, ауыл шаруашылығының тиімділігін арттыру және еліміздің азық-түлік қауіпсіздігін нығайту жөніндегі міндеттеріне толық сәйкес келеді.