Екі ағайынды - бір арман. Алда екі диплом!
Алматы облысынан шыққан Әлихан мен Бекжан Досмұғамет - егіздер. Олар табысты болашаққа қарай үлкен қадам жасады. Екеуі де Kozybayev University студенті атанып, университет University of Arizona-мен бірлесіп жүзеге асыратын «Басқарудағы ақпараттық жүйелер» қос дипломды білім беру бағдарламасына мемлекеттік грант негізінде оқуға түсті.
Бағдарлама туралы ағайындылар ҚР Ғылым және жоғары білім министрлігі ұйымдастырған «Study in Kazakhstan» көрмесінде білді.
Биыл Kozybayev University Халықаралық кампусының командасы University of Arizona-мен бірлесіп жүзеге асырылатын білім беру бағдарламаларын Қазақстанның 15 қаласындағы талапкерлерге таныстырды.
«Құжат тапсырған кезде барлығын дұрыс рәсімдеу үшін қоңырау шалып, нақтылап отырдым. Университетте бізді өте жылы қарсы алды, жатақханалары да өте әдемі. Баршаңызға рақмет! Барлығын Kozybayev University-ге шақырамыз», - деп бөлісті Бекжан.
Әлихан үшін IT бағытын таңдау - бала кезден келе жатқан қызығушылығының жалғасы. Ол компьютерге бала кезінен әуес, ал 10-сыныпта-ақ болашағын технологиялармен байланыстыруды шешкен. Университетті тәмамдағаннан кейін Солтүстік Қазақстан облысында қалуды жоспарлап отыр.
Студенттердің анасы, қазақ тілі мен әдебиеті пәнінің мұғалімі Жазира Солтүстік Қазақстанның қонақжай әрі көркем табиғатын алғаш рет ашқанын айтты.
«Таңертең ерте ояндым. Ауасы қандай таза, Алматыдағыдай емес. Балаларымның Петропавлда білім алатынына қуаныштымын», - деді Жазира Сүйкімбекова.
Ал балаларын алда бұдан да көп мүмкіндік күтіп тұр.
Төртінші курста конкурстық іріктеуден сәтті өткен студенттер АҚШ-та, University of Arizona-ның Тусондағы кампусында бір семестр білім алу мүмкіндігіне ие болады. Іріктеу кезінде академиялық жетістіктер, олимпиадаларға, ғылыми және қоғамдық жұмыстарға, волонтерлік жобаларға қатысуы ескеріледі.
Биыл 182 адам Kozybayev University мен Аризона университеті бірлесіп жүзеге асыратын қос дипломды білім беру бағдарламаларында білім алуға арналған мемлекеттік білім беру грантының иегері атанды.
