Tomorrow School мектебі өз жұмысын бастады
Kozybayev University-де «peer-to-peer» («теңнен теңге») әдістемесі негізінде жұмыс істейтін бағдарламалау және жасанды интеллект бойынша тегін Tomorrow School мектебі өз жұмысын бастады.
Еске сала кетейік, ағымдағы жылдың сәуір айында еліміздің барлық өңірінде Tomorrow School-дың 14 пилоттық жобасының салтанатты ашылуы бір мезетте өтті. Іс-шараға Мемлекет басшысы Қасым-Жомарт Тоқаев пен Ғылым және жоғары білім министрі Саясат Нұрбек қатысты.
Бүгінде мектеп өз жұмысын бастап кетті. Оның қатысушылары қатарында университет студенттерімен бірге бағдарламалау дағдыларын меңгергісі келетін басқа да азаматтар бар. Жобаға қатысуға 180 адам өтініш білдіріп, олардың ішінен шамамен 60 қатысушы іріктеліп алынды.
Жоба Astana Hub технопаркі базасында Alem.ai қорының бастамасымен француздық 01 Edu білім беру платформасымен серіктестікте іске қосылды. Оқу офлайн форматта жүргізіледі.
Мұнда дәстүрлі сабақ кестесі, менторлар немесе дәрістер қарастырылмаған. Оқу үдерісі практикалық тапсырмаларды орындауға, бірлескен жобалар жасауға және бір-бірінің кодын өзара тексеруге негізделген. Білім алу барысында әр студент 50-ден астам нақты жобаны орындап, нәтижесінде мықты портфолио қалыптастырады.
Бағдарлама аясында заманауи бағдарламалау тілдері – JavaScript, Rust, Python, Golang, сондай-ақ жасанды интеллект технологиялары оқытылады.
Алдымен қатысушыларды 4 апталық қарқынды іріктеу кезеңі күтеді. Бұл – университет кампусында бағдарламалауға терең бойлап, қатысушылардың мотивациясы мен «peer-to-peer» форматында өздігінен білім алу қабілеті бағаланатын кезең.
Одан кейін 18 айға созылатын негізгі оқу кезеңі басталады. Бұл кезеңде қатысушылар бағдарламалық өнімдерді әзірлеудің негізгі іргетасын меңгереді.
Келесі кезең – үш айлық тағылымдама және IT-компанияларда нақты жобалармен жұмыс істеу.
Осы кезеңдердің барлығынан сәтті өткен қатысушыларға алты ай бойы өздері таңдаған жеті бағыттың бірін тереңдетіп оқуға мүмкіндік беріледі. Олар, Mobile Development – мобильді қосымшаларды әзірлеу, GameDev – ойын әзірлеу, Cybersecurity – киберқауіпсіздік, Fullstack – толық циклді веб-әзірлеу, Blockchain & Crypto – блокчейн және криптотехнологиялар, AI/ML – жасанды интеллект және машиналық оқыту, Cloud DevOps – бұлттық технологиялар және DevOps.
Қазақстанда Tomorrow School мектептерін іске қосу Мемлекет басшысының жасанды интеллектіні дамыту және цифрландыру жөніндегі ауқымды тапсырмаларын орындау аясында жүзеге асырылуда.
Tomorrow School жасанды интеллектпен және цифрлық құралдармен жұмыс істей алатын, жаңа буындағы отандық IT-мамандарды даярлаудың маңызды тетігі ретінде қарастырылады.
