«Әділетті қоғамға - шыншыл сөз»: құндылықтар мен Қазақстанның болашағы туралы пікір алмасу

Kozybayev University Ғылыми кітапханасының Қазақ тілі, мәдениеті және оқу орталығында Қазақстан Республикасының Президенті Қасым-Жомарт Тоқаевтың «Әділетті қоғамға – шыншыл сөз» атты жаңа кітабының тұсаукесері өтті.

Жаңа оқу жылының кітап, білім және қазіргі қоғамның дамуы үшін маңызы зор құндылықтар туралы мазмұнды әңгімемен басталуының өзіндік мәні бар. Аталған басылым Мемлекет басшысының әр жылдардағы таңдаулы баяндамалары, мақалалары мен пікірлерінен құралған жинақ болып табылады. Кітаптың 21 тақырыптық бөлімінде білім мен ғылым, тарих пен мәдениет, тіл, цифрландыру, жастар, қоғамдық даму және елдің болашағына қатысты өзекті мәселелер қамтылған.
Кездесу барысында кітаптың мазмұны тарих, журналистика, құқық және қазіргі қоғамдық даму тұрғысынан талқыланды. Жиынға университеттің академиялық қауымдастығының өкілдері қатысты. Атап айтқанда, «Қазақстан тарихы және құқық» кафедрасының қауымдастырылған профессоры, тарих ғылымдарының кандидаты Зылиха Бимаканова, «Журналистика және әлеуметтік ғылымдар» кафедрасының профессоры, филология ғылымдарының кандидаты Жақып Мырзантай, Халықаралық ақпарат ғылымдары академиясының академигі, заң ғылымдарының кандидаты Гүлбахша Мұсабаева және қауымдастырылған профессор, тарих ғылымдарының кандидаты Людмила Гривенная өз ой-пікірлерін ортаға салды. Кездесудің тағы бір маңызды тұсы – пікірталасқа студент жастардың да белсенді қатысуы болды.

«Ғылыми кітапхана үшін кітапты пікір алмасуға, ой бөлісуге және оқырманның өзіндік көзқарасын қалыптастыруға мүмкіндік беретін интеллектуалдық алаң ретінде таныту өте маңызды. Жаңа оқу жылы тек жаңа дүниелерді білуге ғана емес, ойлануға, талдауға және маңызды сұрақтар қоюға жетелейтін кітаптармен басталсын», – деді университет Ғылыми кітапханасының директоры Әсия Ермишева.