Ғылым мен практиканың диалогы: университетте су ресурстары саласындағы заманауи сын-қатерлер талқыланды
Университетте Аризона университетінің профессоры Чарльз Гербаның қатысуымен «Су сапасы, микробиологиялық қауіпсіздік және су ресурстарын қайта пайдалану: заманауи сын-қатерлер мен шешімдер» тақырыбында ғылыми семинар өтті.
Іс-шара жас зерттеушілер мен академиялық қауымдастық өкілдерін қазіргі заманның аса өзекті экологиялық мәселелерінің бірі - су ресурстарының сапасы мен қауіпсіздігін сақтау мәселесі бойынша кәсіби пікір алмасу алаңына біріктірді.
Семинар барысында су сапасын бағалаудың жаңа тәсілдері, су нысандарына экологиялық мониторинг жүргізу, су экожүйелері мен биоалуантүрліліктің жай-күйін зерттеу, сондай-ақ биоиндикациялық, аналитикалық және ГАЖ-технологияларды қолдану мүмкіндіктері талқыланды. Солтүстік Қазақстан облысының су ресурстарын зерттеу және сақтау мәселелеріне ерекше назар аударылды.
ФМЕН магистранттары өздерінің ғылыми зерттеулерінің нәтижелерін ұсынды. Олардың қатарында ауызсудың сапасын бақылаудан бастап, табиғи су айдындарының экологиялық жағдайын бағалауға дейінгі зерттеу жұмыстары қамтылды.
Жас зерттеушілер профессор Ч. Гербадан зерттеу әдістемесін жетілдіру, зерттеу бағыттарын кеңейту, сондай-ақ өз жұмыстарының ғылыми және практикалық маңыздылығын арттыру бойынша сараптамалық ұсыныстар алды.
