Kozybayev University және Назарбаев Университеті делегацияларының С.М. Киров атындағы зауытқа сапары

Қозыбаев университетінің командасы және президент Вакар Ахмад бастаған Назарбаев Университетінің делегациясы «С.М. Киров атындағы зауыт» АҚ-да болды. Сапардың басты мақсаты – кәсіпорынның қызметімен танысып, ынтымақтастықтың ықтимал бағыттарын айқындау.

Зауыт 1928 жылы құрылған. Осы уақыт ішінде ол Солтүстік Қазақстан облысындағы ірі өнеркәсіптік кәсіпорындардың біріне айналды. Бүгінде мұнда теміржол және мұнай-газ салаларына арналған өнімдер, сондай-ақ көпқабатты баспа платалары шығарылады.

Бас директор Алмас Нұрмағамбетов қонақтарға өндірістік қуаттарды таныстырып, одан әрі серіктестік орнатуға дайын екенін жеткізді. Ол өндірістік үдерістер туралы айтып, цехтар мен шығарылатын өнімдерді көрсетті. Олардың қатарында ауыр техникадан бастап электроникаға дейінгі өнім түрлері бар.

«Мен Қозыбаев университетінің жұмысына өте қатты әсер алдым. Университеттің қоғам мен өңірдің сұраныстарына қаншалықты сай жұмыс істейтініне, білікті кадрлар даярлайтынына көз жеткіздім. Сонымен қатар өз қызметкерлеріне қосымша білім алуға, кәсіби әлеуетін арттыруға мүмкіндік беретін «С.М. Киров атындағы зауыт» АҚ сияқты кәсіпорындардың жұмысы да мені ерекше таңғалдырды. Бұл олардың өңірдің дамуына өз үлесін қосуына мүмкіндік береді», – деді Вакар Ахмад.

Екі университет пен С.М. Киров атындағы зауыт арасында үшжақты серіктестік орнату бірлескен ғылыми жобаларды іс жүзінде жүзеге асыруға қажетті өндірістік алаңдарды анықтауға мүмкіндік береді.

«Негізгі мәселе – біздің ғалымдарымыз түрлі мәселелердің шешімдерін ұсынады, алайда бұл идеяларды жүзеге асыратын цехтарымыз бен өндірістік алаңдарымыз жоқ. Ал сіздерде жергілікті орта мен жағдайды жақсы түсіну, өндірістік қуаттар бар. Сондықтан бірлесіп жұмыс істеу арқылы оң нәтижелерге қол жеткізе аламыз», – деп атап өтті Назарбаев Университетінің вице-президенті Гүлмира Қанай.

Қозыбаев университеті мамандар даярлау бағытында аталған зауытпен көп жылдан бері ынтымақтастық орнатып келеді. Жыл сайын университет студенттері кәсіпорында өндірістік практикадан өтеді. Сонымен қатар дуалды оқыту және индустриялық докторантура аясында кәсіпорын қызметкерлері университетте білім алады.

Серіктестіктің келесі кезеңі – бірлескен ғылыми жобаларды жүзеге асыру.