Kozybayev University және қытайлық серіктестер жаңа өндірістерге мамандар даярлауды бастайды

Солтүстік Қазақстан облысында М. Қозыбаев атындағы СҚУ, Шыңжаң ауыл шаруашылығы кәсіптік-техникалық университеті және «Тайкунь» корпорациясы білім беру және өндірістік ресурстарын біріктіреді.

 Kozybayev University-де қытайлық серіктестермен кездесу өтті. Тараптар агроөнеркәсіптік бағыт бойынша мамандарды бірлесіп даярлау жөнінде келісімге келді. Студенттер Қазақстан мен Қытайда білім алып, заманауи технологияларды меңгеріп, корпорация кәсіпорындарында өндірістік тәжірибеден өте алады. Жоғары курс студенттері үшін дуальды оқыту қарастырылған. Алғашқы қабылдау 20–30 студентті құрауы мүмкін. Сонымен қатар қос дипломды білім беру бағдарламасын іске қосу мәселесі де қарастырылуда.

«Біз мамандарды жай ғана білім беру бағдарламасы бойынша емес, нақты өндіріс пен жұмыс берушіге қажетті нақты құзыреттерге бағыттап даярлағымыз келеді. Бұл білім беруді, практиканы және жұмысқа орналасуды біртұтас жүйеге біріктіруге мүмкіндік береді», – деді М. Қозыбаев атындағы СҚУ ректоры Ербол Исакаев.

Бағыттардың бірі Қазақстандағы «Тайкунь» жобалары үшін мамандар даярлау болады. Корпорация Қазақстанда күнбағыс тұқымын өңдейтін зауыт, сондай-ақ өсімдік майын, ақуыз және жемшөп өндіретін кәсіпорын ашу мүмкіндігін қарастырып отыр. Жоба аясында шамамен 80 жұмыс орнын құру жоспарлануда.

«Біз Қазақстанға алғаш рет келіп отырмыз. Алдағы уақытта Қазақстанда күнбағыс тұқымын өңдейтін зауыт ашуды жоспарлап отырмыз. Бұл жобаның жүзеге асырылуы шамамен 80 жаңа жұмыс орнын құруға мүмкіндік береді», – деді «Тайкунь» корпорациясы партия комитетінің хатшысы, кадрлар жөніндегі директордың орынбасары Хэ Цзяньшэн.

Сапар аясында Қазақстан-Қытай ауыл шаруашылығы және мал шаруашылығы академиясы және Орталық Азия астық, майлы дақылдар мен жемшөпті өңдеу технологияларының оқу орталығы ашылды.

«Біз бір-бірімізге қажетпіз және бірлесіп көп нәрсеге қол жеткізе аламыз. Екі университеттің мүмкіндіктерін біріктіру практикалық оқыту мен сұранысқа ие мамандарды даярлауға қажетті жағдай жасауға мүмкіндік береді», – деді Шыңжаң ауыл шаруашылығы кәсіптік-техникалық университеті Зоотехнология институтының директоры, партия комитеті хатшысының орынбасары Чжан Вэй.

Сондай-ақ Kozybayev University студенттерін «Тайкунь шәкіртақысы» бағдарламасы аясында оқыту жөнінде меморандумға қол қойылды.