Huawei ICT Competition 2026–2027 Roadshow
Университетте Huawei компаниясының ұйымдастыруымен Huawei ICT Competition 2026–2027 Roadshow атты білім беру іс-шарасы өтті.
Іс-шара барысында IT, электроника, телекоммуникациялар және радиотехника бағыттарында білім алып жатқан студенттер ақпараттық-коммуникациялық технологиялардың қазіргі даму үрдістерімен, компанияның білім беру бастамаларымен және АКТ саласындағы кәсіби даму мүмкіндіктерімен танысты.
Кездесу кезінде Huawei компаниясының таланттар экожүйесін дамыту жөніндегі менеджері Нұрсая Аратбаева компанияның тарихы мен негізгі қызмет бағыттары, Huawei ICT Academy жұмысы, қолжетімді білім беру курстары және сертификаттау бағдарламалары туралы айтып берді.
Кездесуде халықаралық Huawei ICT Competition байқауына ерекше назар аударылды. Қатысушылар конкурс бағыттары, тіркелу ережелері, іріктеу кезеңдері, байқау сынақтарына дайындық және халықаралық деңгейге шығу мүмкіндіктері туралы ақпарат алды.
Huawei ICT Competition студенттерге компьютерлік желілер, бұлтты технологиялар, есептеу жүйелері, жасанды интеллект және басқа да перспективалы бағыттар бойынша алған теориялық білімдерін іс жүзінде қолдануға мүмкіндік береді. Жаңа маусымда білім беру мақсатындағы Roadshow Қазақстанның 48 жоғары оқу орнын қамтиды.
Өткен жылы Kozybayev University университетінің 200-ден астам студенті IT байқауына қатысты. Биылғы жылы студенттер іс-шара барысында QR-код арқылы байқауға тікелей тіркеле алды. Қатысушылардың барлығына Huawei компаниясының арнайы сыйлықтары табысталды.
Roadshow аясында Қазақстан студенттерінің жасанды интеллект саласындағы құзыреттерін дамытуға бағытталған стратегиялық бастама - AI-Sana бағдарламасы туралы да ақпарат берілді.
«Біз ҚР Ғылым және жоғары білім министрлігімен белсенді ынтымақтастық орнатып келеміз және өзара меморандумға қол қойылды. Өткен жылы AI-Sana бағдарламасы аясында біздің компания ресми серіктес ретінде қатысып, жасанды интеллект бойынша білім алуға арналған курстарды меңгеру платформасын ұсынды», - деді Huawei компаниясының таланттар экожүйесін дамыту жөніндегі менеджері Нұрсая Аратбаева. Айта кетейік, аталған курстардан университетіміздің 6 мыңнан астам студенті өтті.
Кездесудің тағы бір бөлігі жастарға арналған мансаптық мүмкіндіктерге арналды. Компания өкілдері студенттерге кәсіби даму бағытын қалай қалыптастыруға болатынын түсіндіріп, білім алу, сертификаттарға ие болу және технологиялық байқауларға қатысудың болашақта жұмысқа орналасу кезінде қандай мүмкіндіктер беретінін айтып берді.
