Халықаралық тәжірибе – табысты мансапқа бастар нық қадам

Kozybayev University-дің LOGO e.V. қауымдастығымен 10 жылдан астам уақыт бойы қалыптасқан ынтымақтастығының арқасында студенттер Еуропаның жетекші аграрлық кәсіпорындарында алты айлық ақылы өндірістік тәжірибеден өту мүмкіндігіне ие болып келеді. Осы уақыт аралығында 100-ге жуық студент Германияның ауыл шаруашылығы кәсіпорындарында тәжірибеден өтіп, заманауи технологиялармен танысты, кәсіби дағдыларын жетілдіріп, халықаралық ортада жұмыс істеудің құнды тәжірибесін жинақтады.

Студенттер заманауи көкөніс өсіру әдістері мен шикізатты өңдеудің инновациялық стандарттарын меңгеріп қана қоймай, ірі агроқұрылымдарда да, органикалық жұмыртқа, сүт өндіруге немесе омарта шаруашылығына маманданған шағын отбасылық фермаларда да жұмыс істеді.

Осы аптада университетте Агротехнологиялық факультеттің үшінші курс студенттері мен LOGO e.V. халықаралық одағының төрағасы Хартвиг Менненнің кездесуі өтті. Іс-шара барысында Меннен Германияда өндірістік тәжірибеден өту бағдарламасы туралы жан-жақты ақпарат беріп, үміткерлерге қойылатын талаптарды, құжат тапсыру тәртібі мен конкурстық іріктеудің негізгі кезеңдерін түсіндірді. Сонымен қатар тәжірибеден өту шарттары, қатысушылардың кәсіби міндеттері және халықаралық тәжірибенің студенттерге ашатын мүмкіндіктері туралы айтылды.

2026 жылы Агротехнологиялық факультеттің жеті студенті Германия кәсіпорындарында өндірістік тәжірибеден өтіп жатыр. Бұл – олардың кәсіби қалыптасуындағы маңызды қадам. Студенттер халықаралық аграрлық ортаға еніп, Еуропаның тәжірибелі мамандарынан үйреніп, кәсіби көкжиегін кеңейтуде.

Мұндай тәжірибе – жай ғана тағылымдама емес. Бұл – кәсіби шеберлікті шыңдауға, жаһандық ойлау қабілетін қалыптастыруға және тұрақты ауыл шаруашылығын дамытуға бастайтын нық қадам.