Тәжірибе алмасу және ынтымақтастық перспективалары: С. Аманжолов атындағы ШҚУ делегациясының сапары

Бүгін біздің университетімізге Сәрсен Аманжолов атындағы Шығыс Қазақстан университетінің өкілдері келді.

Әріптестер Kozybayev University мен Аризона университеті арасындағы стратегиялық әріптестік жобасымен танысу, тәжірибе алмасу және одан әрі ынтымақтастық бағыттарын айқындау мақсатында арнайы сапармен келді.

Kozybayev University Басқарма төрағасы – ректор Ербол Исакаев қонақтарға университеттің заманауи зертханалық базасын, азық-түлік қауіпсіздігі, агроөнеркәсіптік кешен, су ресурстарын зерттеу, ГАЖ-технологиялар салаларындағы ғылыми зерттеулерді, сондай-ақ Tomorrow School және Цифрлық трансформация және жасанды интеллект орталығының қызметі аясында студенттердің әзірлеп жатқан IT өнімдерін таныстырды.

Ректордың айтуынша, Аризона университетімен төрт жылдан астам уақыт бойы жүргізіліп келе жатқан бірлескен жұмыс жобаның тиімділігін көрсетті. Бүгінде Петропавлдағы микрокампус тек кадрлар даярлап қана қоймай, сонымен қатар күріш геномикасы, ауыл шаруашылығы дақылдарының тұрақты сорттарын шығару, сондай-ақ күкіртті полимерлеу технологиясы бағыттарындағы ауқымды ғылыми зерттеулерді практикалық іске асыруға көшіп отыр.

Сонымен қатар университетте қытайлық серіктестермен бірқатар бірлескен бастамалар жүзеге асырылып жатқанын атап өткен жөн. Мәселен, Хэнань ауыл шаруашылығы инвестициялық тобымен бірлесіп Қызылжар ауданында Қазақстан-Қытай агротехнологиялар және экспорттық даму технопаркін құру жобасы іске асырылуда.

Жалпы, Солтүстік Қазақстан облысындағы жалғыз көпсалалы жоғары оқу орны ретінде Kozybayev University, ең алдымен, өңірдің қажеттіліктеріне жауап беруге ұмтылады.

«Біз облыс кәсіпорындарымен тығыз байланыста жұмыс істейміз. Мысалы, дипломдық жобаларды олардың сұраныстары негізінде дайындау моделіне көштік. Әрбір осындай бітіруші жұмысы Солтүстік Қазақстан облысының мекемелері, бизнес өкілдері мен серіктестеріміз алға қойған нақты міндеттерді шешуге бағытталған. Біз барлық дипломдық жобаларды қамтитын арнайы каталог әзірледік. Осылайша, өңірге туындаған мәселелерді шешуге көмектесіп, студенттердің әлеуетті жұмыс берушілермен өзара байланыс орнатуына мүмкіндік береміз», – деді Ербол Исакаев.

Сондай-ақ қонақтар «С. Аманжолов атындағы ШҚУ-дың инклюзивті білім беру ортасы: тәжірибе, мүмкіндіктер, перспективалар» атты семинарға қатысты. Семинар спикерлері - Басқарма мүшесі - академиялық мәселелер жөніндегі проректор Нұрлана Әлімбекова және педагогикалық білім беру және менеджмент кафедрасының меңгерушісі Наталья Радченко.

Олар өз университетінде жұмыс істейтін «Dana bala» үздіксіз және инклюзивті білім беру орталығының қызметі туралы айтып берді.

«Dana bala» орталығы - біздің жұмысымыздың маңызды бөлігі. Оның мақсаты - психологиялық-педагогикалық зерттеулердің нәтижелерін Шығыс Қазақстандағы білім беру ұйымдарының тәжірибесіне енгізу. Мұнда жаңа әдістемелер сынақтан өткізіліп, студенттердің практикасы ұйымдастырылады, білім беру бағдарламаларын бейімдеуге көмектеседі. Ерте араласу технологияларына ерекше көңіл бөлінеді», – деп атап өтті Нұрлана Әлімбекова.

Біздің университетте 2024 жылдан бері заманауи педагогикалық құрал-жабдықтармен жабдықталған Инклюзивті білім беру орталығы жұмыс істейді. Мұнда студенттерді педагогика және психология саласындағы инклюзия бағытында даярлау жүзеге асырылады. Оның ішінде Аризона университетімен бірлескен қос дипломды білім беру бағдарламалары да бар.

Бұл бағыттар да алдағы уақытта ынтымақтастық орнатуға, бірлескен ғылыми зерттеулер жүргізуге және тәжірибе алмасуға мүмкіндік беретін өзара байланыс нүктелеріне айналуы мүмкін.