М. Қозыбаев атындағы СҚУ және «ҚазақМедИмпорт»: кадр даярлаудан бірлескен әзірлемелерге дейін

М. Қозыбаев атындағы СҚУ мен «ҚазақМедИмпорт» ЖШС инженерлер даярлау мен студенттердің практикалық білім алуынан бастап, бірлескен әзірлемелер мен медициналық саладағы жаңа шешімдерді коммерцияландыруға дейінгі жүйелі әріптестік орнатуға келісті.

Университетке келген компания өкілдері Бас директор Сергей Рябчинский бастаған делегация құрамында оқу-зертханалық инфрақұрылыммен, UniMed клиникасымен және жоғары оқу орнының инженерлік кадрлар даярлау, ғылыми зерттеулер жүргізу бағытындағы мүмкіндіктерімен танысты.

Кездесудің басты нәтижелерінің бірі — «ҚазақМедИмпорт» ЖШС мен М. Қозыбаев атындағы СҚУ арасындағы өзара іс-қимыл жөніндегі Жол картасына қол қою болды. Құжат дуальды оқыту, өндірістік тәжірибе мен тағылымдамаларды ұйымдастыру, компания қызметкерлерінің біліктілігін арттыру, «ҚазақМедИмпорт» мамандарын оқу үдерісіне тарту және кәсіпорын базасында «Көлік және машина жасау» кафедрасы бөлімшесін құру бағыттарын қамтиды.

Ынтымақтастықтың маңызды бағыты - бірлескен ғылыми-инновациялық жұмыс. Университет пен компания жаңа бұйымдарды әзірлеу және сынақтан өткізу, конструкторлық құжаттама дайындау, ғылыми жобаларды жүзеге асыру және гранттық бағдарламаларға қатысу үшін ғылыми-білім беру орталығын құруды жоспарлап отыр.

Сондай-ақ зерттеу нәтижелерін нақты өндіріске енгізуге басымдық беріледі. Тараптар әзірлемелерді коммерцияландыру, зияткерлік меншікті қорғау, патенттеу және жаңа өнім түрлерін нарыққа шығару бағытында бірлесіп жұмыс істейтін болады.

UniMed клиникасы базасында «ҚазақМедИмпорт» медициналық жабдықтарының демонстрациялық алаңын құру жоспарлануда. Бұл оқыту, технологияларды сынақтан өткізу және тәжірибелі мамандардың кері байланысын біріктіруге мүмкіндік береді.

Серіктестік кадрлық бағыттарды да қамтиды: мектеп оқушыларына кәсіби бағдар беру, ашық дәрістер мен шеберлік сабақтарын өткізу, кәсіби байқаулар ұйымдастыру, студенттердің тәжірибеден өтуі және түлектерді жұмысқа орналастыру.

Бүгінде М. Қозыбаев атындағы СҚУ түлектері компанияда еңбек етіп жүр.

Әріптестер университеттің құзыреттері мен өндірістің мүмкіндіктерін біріктіріп, жаңа технологиялық шешімдер жасауға ниетті.