Болашақ мұғалімдер: Қозыбаев университеті СҚО оқушыларына мамандық таңдауға қалай көмектеседі
Қозыбаев университеті академик Е.А. Бөкетов атындағы мектеп-гимназиясымен және Сергеевка қаласындағы Кәкімбек Салықов атындағы орта мектеппен ынтымақтастық туралы меморандумдарға қол қойды. Құжаттар ұзақ мерзімді серіктестікті дамытуға, білім беру сапасын арттыруға, оқушылардың зияткерлік, шығармашылық және зерттеушілік әлеуетін ашуға, кәсіби бағдар беруге, сондай-ақ педагогтердің құзыреттілігін жетілдіруге бағытталған.
Маңызды оқиғалардың бірі - аталған білім беру ұйымдарының базасында педагогикалық сыныптардың ашылуы. Kozybayev University Педагогикалық факультетінің оқытушылары оқушыларға арналған интерактивті сабақтар өткізіп, педагогикалық сыныпта білім алудың ерекшеліктерімен таныстырды.
Қазіргі таңда Ғабит Мүсірепов және Шал ақын аудандарында осындай 3 педагогикалық сынып ашылды. Ал қазан айында Солтүстік Қазақстан облысының Қызылжар және Мамлют аудандарында тағы 2 сынып ашу жоспарланып отыр.
Педагогикалық сыныптардың негізгі мақсаты - оқушыларға ерте кәсіби бағдар беру және дарынды жастарды мұғалім мамандығына тарту. Мұнда оқушылар педагогика, психология, шешендік өнер және көшбасшылық негіздерін тереңірек меңгереді. Сабақтарды университет оқытушылары онлайн және офлайн форматта өткізеді. Сонымен қатар оқушылар үшін университетке экскурсиялар және профессорлардың көшпелі дәрістері ұйымдастырылады.
Университет пен мектептердің бірлескен жұмысы оқушылардың болашақ мамандығын саналы түрде таңдауына және білім беру саласындағы жаңа бастамаларды жүзеге асыруына тың мүмкіндіктер береді деп сенеміз!
